No.5925/2020-2021

Hnahthial District bawrhsap Pu Vanlalmawia kaihhruai Hnahthial Town Cleanliness Week & Cleanliness Competition Committee ruahmanna in Faina Hapta 2020 hman mek leh Khawpui Fai inelna pualin vawiin 09/10/2020 khan Hnahthial khawpui chhunga veng hrang hrang, Zirna In hrang hrang leh Sorkar Pisa hrang hrang ten 'FAINA HNATLANG PUI an thawk Hnahthial khawpui chhunga Faina Hnatlang Pui neihah hian veng hrang hrang 8 te chu VC te kaihhruaiina hnuaiah vengchhung inkalpawhna kawng, Tui luankawr leh vantlang hmun pawimawh hrang hrang thenfai hnathawh a ni a, veng hrang hrang a hnatlang thawk chhuakte hi mi 1200 bawr vel an ni.

Hnahthial Town Cleanliness Week & Cleanliness Competition Committee chuan Hnahthial khawchhung Village Council tinah Rs.5000 theuh pein hnatlangte thingpui inna atan leh bawlhhlawh paihna tur motor hire nan hman a ni hlawm a ni.

Hnahthial-a Faina beihpui thlak chhoh mekah hian District Bawrhsap Pu Vanlalmawia chuan “Hnahthial hi khawpui fai kan lo ni tawh thinin Mizoram pum huapah lawmman pahnihna pawh kan lo dawng tawh a, he dinhmun aia sang zawka ding turin theihtawp chhuahin hma kan la zel dawn a ni” tiin rampum huapa lawmman lak ngawr ngawr ringawt ngaihtuah lovin mitin nunah Faina chu bet nghet se a duh thu a sawi a, Faina chu mitin tih theih a nih avangin Hnahthial District chuan kumin atan hian ‘Fai i tlin e, nang i hmunah kei ka hmunah’ tih chu thupui atan an hman thu a sawi bakah mahni awmna hmun theuh fai taka enkawl chu mitinin an mawhphurhnaah ngai turin a chah bawk a ni.