Ni thum chhung awh FAI (Fédération Aéronautique Internationale) Category II International Paragliding Accuracy Championship, 2020, Serchhip a neih chu vawiin tlai khan khar a ni a. Chief Minister, Pu Zoramthanga chuan khuallian niin he intihsiak a tithate hnenah lawmman a hlan a ni.

Chief Minister Pu Zoramthanga chuan paragliding intihsiakna hlawhtling tak neih a ni chu lawmawm tiin participant zawng zawng chungah lawmthu a sawi a. Mizoramin a vawi khatna atana international level championship a thleng chu ropui a tih thu sawiin, nakin zelah pawh khawvel huap paragliding intihsiakna hi Mizoramin a thlen leh zel a beisei thu a sawi a. Chumi atan chuan participant tam zawk an tel a, he intihsiakna hi Mizoram leh India ramah a lo than len zel a beisei thu a sawi. Intihsiakna a tel pilot te pawh championship neih chhungin hun nuam tak an hman a beisei thu leh, intihsiakna buatsaih leh zel turah pawh lo tel thin turin a sawm a ni. Chief Minister chuan Mizoram chu ram te tak te, development lamah ram changkang zawkte nen khaikhin chuan la sanglo tak ni mahse a chhung a cheng ten theihtawp an chhuah a tihtak zeta an thawhchuan khawvelah kan langsar thei a ni, a ti a. Zoram hmun tinah mipuite chu eng chhuah tura sawmin, ram dang mite an lo kalin mipuiin an nunah leh chet danah Mizoram mawina leh thatna an lan chhuah tir theih nan inbuatsiah theuh turin a sawm. Pu Zoramthanga chuan vawiina rahbi pakhat kan rah tawh na atang hian khawvela langsar chho zel theihna turin rahbi danga kaichho zel a hmasawn thei turin hmalak puiah mipui a sawm a. Chief Minister chuan Serchhip bialtu MLA te, official te, mipui te leh he intihsiak buaipuitu zawng zawng chungah lawmthu sawiin, he championship hi intihsiakna chhinchhiahthlak tak a nih zel a beisei thu a sawi a ni.

He intihsiakna kharna inkhawm a khualzahawm Tourism Minister Pu Robert Romawia Royte chuan MASA leh department hmalakna zarah tuna Paragliding Championship nghahna hmun chu paragliding na hmun nghet a nih theih tak tur thu a sawi a. Khawvel hriat ah India ram leh Mizoram pho chhuah theihna hmun tur a nih thu sawiin, tuna Championship kan thlen pawh hi Serchhip emaw Mizoram in a thleng chauh nilovin, India ramin a thleng a ni, a ti. World Cup thleng turin leh kum tin a neih annual event a nih theihna turin hmalak chhoh zel a nih tur thu leh phuisui zawkin infrastructure tha zawk pawh siam tum a nih thu a sawi. Tourism Minister chuan adventure sports leh tourism tihhmasawn tura hmalak zel a nih thu sawi bawkin, competition neih leh hunah chuan Mizo thalai tam zawk a tel ngei a beisei thu a sawi a. Pu Robert Romawia Royte chuan he championship neih theih nan a sum mamawh angte harsa lo taka NEC atangin leh Mizoram sorkar atangin a hun taka hmuh a ni chu lawmawm a tih thu sawiin, Serchhip DC hmalakpuina leh mipui te tawiawmna chungah pawh lawmthu a sawi bawk.

He Paragliding Championship ah hian Korea, Afghanistan, Kazakhstan leh India atangin an tel a, Mizo thalai pahnih an tel bawk. Hmeichhe category ah chuan Jin Hee Baek (South Korea), pahnihna Jae Ryun Ha (South Korea) leh pathumna Rupa Devi Karki (India) te an ni a. Mipa category ah hian pakhatna chu Byung Chang Jeun (South Korea) a ni a, pahnihna chu Igor Virshki (Kazakhstan) niin pathumna chu Vishal Kumar (India) a ni. Lawmman hi mipa leh hmeichhe category ah hian pakhatna in euro 2000, pahnihna in euro 1500, pathumna in euro 1300 an dawng a ni. Team intihsiakna ah pakhatna Korea team, pahnihna Bir Billing leh pathumna 3K te an ni.

Vawiin Paragliding Championship kharna inkhawm hi Pi Esther Lalruatkimi, IRS, Commissioner & Secretary, Tourism chuan kaihruaiin, Serchhip DC Dr. Lalzirmawia Chhangte chuan lawmthu sawiin hun hi a khar a ni. Serchhip bialtu MLA Pu Laduhoma, Tuirial bialtu MLA Pu Andrew H. Thangliana, Tourism Development Board Vice-Chairman Pu TC Pachhunga leh Adviser to CM Pu C. Lalramzauva te tel bawkin lawmman hi an sem ve bawk. Serchhip SP Pu R. Sathyiasundaram leh Serchhip leh Aizawl atanga official lo kal te he hunah hian an tel bawk.

FAI Cat II International Paragliding Accuracy Championship 2020 hi February ni 12 khan a hawnna hun hman niin ni 13 atang khan vawiin ni 15 thleng hian intihsiakna kalpui a ni a. Player te hi round 8 in an in el a. Macedonia leh Slovenia atangin endiktu an lo kal a. Intihsiakna neih chhung hian competitor te zingah injury a awm lo a ni.

Chief Minister hian Paragliding Championship kharna hun a hmanpui hma hian Serchhip Leisekawt Field a KTP General Conference thlenna tur pandal sak lai chu a hmunah a en a ni.

Attachment

  • Loading attachment...