Vawiin khan Champhai -III Project hnuaia Lo leh Huan neitu  Khawzawl leh Ngaizawl khuaa Watershed Committee ten an thlan chhuahte hnenah Integrated Watershed Management Programme (IWMP)/Pradhan Matri Krishi Sinchai Yojana (PMKSY) kaltlangin  tanpuina Tui Pipe semchhuah a ni a, heng Tui Pipe-te hi  Project Implementing Agency (PIA), Khawzawl BDO Dr. Saithangpuia'n a hlan a ni.

Sermchhuahna puala inkhawm tawi Khawzawl BDO Pisa tuala neihah BDO Dr. Saithangpuia chuan Central Sawrkar leh Mizoram Sawrkar-in loneitute leh kuthnathawktute an ngai pawimawh tih sawiin, IWMP/PMKSY pawh hmalakna pakhat a ni a, sawrkarin thahnemngai taka hma a lak hrerenga   hlawhtlin tuma theihtawp chhuah ve turin a fuih a.  Sawrkar atanga hamthatna dawn reng rengte  a hmanna tur dik taka hman a tul thu sawiin, a nihna tur ang ni loa hmang emaw, tiral emaw an awm chuan an chungah dan ang taka hremna lekkawh theih a ni, a ti a. Tuihna humhalh leh hman tangkai a pawimawhzia tarlangin, IWMP/PMKSY hamthatna dawngtute  chu tuihna humhalh thei zawnga hmala turin a fuih a.  PMKSY/IWMP hnuaia hmalaknate chu sawrkar laipui lamin a khat tawka tlawhin hmasawn dante an thlithlai reng thin thu leh   Champhai - III Project hnuaia hmalaknate pawh a hmuna tlawha endik tuma  ruahmanna siam anih thu a sawi a.  Kalkhawmte chu hnathawh duh tak takna leh  hlawhtl;in pui tham hna thawk turin  a chah nghal a ni. 

He hunah hian Khawzawl Watershed Committee Chairman Pu Tawklinga hnen atangin Pipe dawng tur   thlan chhuah dan ngaihthlak niin, Lo leh Huan siam tak takte chauh an thlang chhuak tih a sawi a. Watershed Committee hian an beneficiaries  hna thawk tak tak te chauh hma an laksak dawn tih a sawi bawk. Hun hman zawh hnuah hian Project Implementing Agency, Khawzawl BDO Dr. Saithangpuia chuan Khawzawl leh Neihdawn atanga thlan chhuah Beneficiaries 57 te hnenah Tui Pipe Roll 110 a sem chhuak a.  Khawzawl atangin Beneficiaries 47 leh Ngaizawl atangin Beneficiaries 10 in Pipe Roll hi an dawng a ni.