Ni 13.2.2020 (Ningani) leh ni 14.2.2020 (Zirtawpni) khan Serchhip District Information & Public Relations Department chuan SEDP Project Site visit district MJA member te tan a buatsaih a, Pradhan Mantri Gram Sodak Yojana (PMGSY) hmanga district chhunga hnathawh zawh hlim te, thawh mek te leh ruahmanna siam mek kawng te an tlawh kual.

Ni 13.2.2020 (Ningani) zingah khan MJA team te hian Serchhip chhuahsanin Khawlailung leh Piler inkar kawng hnathawh mek an tlawh hmasa bera, Pu C. Lalfakzuala, JE in a hmunah lo dawngin Piler kawng thawh mek chungchang report a lo pe a. Kawng hi Survey ah km 4.16 a nih laiin Formation Cut tih fel hnuah meters 173 vel zetin a thui belh thung tih a sawi a. Contractor hi Pu Roenga, Republic Veng Aizawl niin Estimate hi Rs. 640 lakh a ni. GSB phah zo tawhin WBM an phah mek a, kumin May thlaah zawh beisei a ni. 

Piler kawng en zawhah Hmunzawl panin Lungpho leh Hmunzawl inkar kawng kum 2016 a thawh zawh tawh, Contractor in a enkawl chhunga la awm mek si leh chutiang thova thawh zawh hlim Rullam leh Lungpho inkar te an en zui leh a, a bialtu SDO Pu Lalrintluanga leh bialtu JE ten lo dawngin tun dinhmuna heng kawng chinchang te hi report an pe bawk. Lungpho to Hmunzawl hi km 30.8 a sei niin F. Kapsanga Construction (FK)  ten an thawk a, estimate hi Rs. 2093.43 niin March, 2016 khan an zo tawh a, March 2021 thleng enkawl zui hi contractor kuta awm a ni a, Rullam leh Lungpho inkar hi Pu. H. Thangzova, Tuikual North in Rs. 963.68 lakh in a thawk a, November 2016 ah a zo tawh a, a enkawl zui hna hi November 2021 thleng contractor kutah a awm bawk.

Lungpho ah riakin a tuk, Zirtawpni khan Sialhau leh Thentlang inkar kawng thawh mek an en zui leh a, he kawng enkawltu SDO Pu. Lalduhzuala leh Contractor ten lo dawngin hmalakna tlangpui an lo hrilhfiah a, Contractor hi V. Lalbiakzama, Venghlui niin kawng thui zawng hi 19.540kms a ni a, estimate hi Rs. 1188.58 lakh a ni. He kawng hi chu thawh hmabak a la awm nual a, thawktute an inbuatsaih mek a ni. MJA te hian Serchhip district chhung Lungpho tlang dung leh Serchhip tlang dung inpawhna kawng tha, kum tluana tlan theihna kan la nei rih lo chu an vei thu leh ruahmanna a awm leh awm loh an zawhna chhangin Pu Lalduhzuala, SDO chuan, Sialhau Pengthuam leh Lungpho Ramrikawn inkar kawng hi PMGSY 2 ah proposal thehluh a nih thu te, Khawlailung leh Hmunzawl inkar kawng pawh survey tura ruahman a nih thu te a sawi a. A hlawhtlin thuai an beisei thu a sawi a ni.

MJA President Pu Kapliana Pachuau chuan, sawrkarin Project site visit thuthar thehdarhtute tana a buatsaih thin chu lawmawm a tih thu leh an tangkai pui hle thusawiin, chhunzawm zel chi nia a hriat thu a sawi a. Media miten mahni district ngeia hmasawnna hnathawh te zira, hmua kan han tlawh ngei hian kan thil hriat a fiahin a chiang a, a hlawkna tel tu mipuite nena inkawmna remchang te a awm zel bawk nen, kan tangkaipui tak zet a ni, tiin Project Site Visit an  hlut thu a sawi a ni.

Tun tum Serchhip district Project site visit ah hian MJA member pasarih an tel a, Serchhip DIPRO, Pu. K. Saitluanga leh AVPA Pu. Ramfangzauva Fanai ten an hruai a ni. Tha taka lo dawng sawnga an mamawh apiang lo ngaihtuah saktu PWD Serchhip Division leh Khawzawl Division a thawktute, Piler, Lungpho leh Sialhau khawtlang hruaitute chungah te lawmthu an sawi a ni.