1516/2026-2027

Kawrthah, the 24th July 2026: Vawiin khan Kawrthah North Village Council chuan Deen Dayal Upadhyay Panchayat Satat Vikas, 2025 hnuai ah "Clean & Green Panchayat," lawmman pakhatna an dawn lawmna an khuaah an buatsaih a, Chief Minister Pu Lalduhoma chuan khuallian niin a telpui a. Pu B. Lalchhanzova, Minister, I&PR chuan Chief Minister hi a tawiawm a ni.

Tun hnaia India rama thil thleng chungchangah Chief Minister chuan, sorkar laipuiin FCRA Amendment kalpui a tum danah kan tana pawm theih loh a awm tih kan hria a, naktukah CCM leh MKHC hruaitute meeting kan neihpui ang a, he amendment an kalpuina tura kan duh dante central sorkarah kan thlen dawn a ni.

Tun laiin NEET Exam paper leakout avangin India ram pumah thalaiten lungawilohna an lantir a, Aizawlah pawh niminah te, niminpiahahte kan thalaite an pung khawm a. Heng kan thalaite hi kan thlawp a ni. He movement kal meka chawngheia nawrhna kalpuitu Sonam Wangchuk pawh kha kan thlawp a, kan tawrhpui a ni, a ti.

Chief Minister chuan, PIB Press Release-a a lan danin India ramah hian village (thingtlang khua) hi 6, 65,000 (nuaih ruk sing ruk leh sangnga) a awm a, Rural Local Body (VC kan tih ang hi) hi 2, 68,000 (nuaih hnih sing ruk leh sang riat) an awm bawk a. He ti zat thingtlang khaw zinga - Ministry of Panchayat “Clean & Green Panchayat 2025” lawmman pakhatna dawng thei khua, Kawrthah North hnathawh hi a ropui ka ti a. A lawmnaah pawh hian rawn tel loh chi niin ka hre lo a ni.

Kan sorkar hi hmathlir thui tak neia ke pen kan ni a. Kan long term vision chu kum 2047-a India ram GDP-a zaa pakhat (One percent) lo thawhchhuah ve theih hi a ni. Chu hmathlir tihlawhtling tura kan tihtur hmasa chu khaw tinte Sustainable Development Goals tihpuitlin hi a ni. Khaw hrang hrangte SDG Index en theihna SDG Dashboard kan siam a, khaw tin data kan la khawm a. Kan hmalakna pawhin rah tha a chhuah a. NITI Aayog-in tun hnaia Second Edition of District Sustainable Development Goals Index Report a tihchhuahah khan India hmarchhak bialah Hnahthial district chu pakhatna a ni a, Champhai district chu pahnihna a ni a, Kolasib district chu pakuana a ni a. District dang zawng zawngte pawh hi a titha pawl (front runner) an ni vek a ni.

Kan hmathlir dikzia tilang fiah turin Ministry of Panchayati Raj chuan Village Sustainable Development Goals hi a rawn vei ve chiah a. India ram pumah intihsiakna a kalpui a, Clean & Green huangah Kawrthah North chu pakhatna in lo ni a. He khawtlang hian India ram hmathlir Viksit Bharat 2047 leh Mizoram hmathlir Viksit Mizoram 2047 te tihhlawhtlinna kawngah hna in thawk tha tihna a ni ta a ni.

Kawrthah North hian, thingtlang mipuite hian Sustainable Development Goals tihhlawhtlinna kawngah thil tam tak an ti ve thei a. Infrastructure lian pui pui nena bultan kher lovin, mipui tangrualten hna ropui tak an thawk thei a ni, tih kha in tilang a ni, a ti.

Mamit district Kawngpui chungchang pawh sawiin Chief Minister chuan, Lengpui to Langkaih kawng, NH 108 hi Double Lane-a siam tur a ni a, hnathawktu M/s Gayatri Project Limited, Hyderabad-ten an thawh zawh theih tak loh avangin 24.8.2023 khan ban an ni a. Hna hmabak (Balance Work) te thawhna tur estimate hi Rs. 170.96 crore kan siam a, sorkar laipui chuan ni 8.10.2025 khan min rawn approved a. A thawk turin kumin 13.5.2026 khan M/s Nidhi Creative Infrastructure, Silchar chu thlan an ni a. Anni hian hna hi an thawk nghal a, fur ruahtui a tlak chhunzawm tak avangin kawng chhuat tak hi chu an khawih zui thei ta rih lo a ni.

Darlak leh Tuidam inkar short cut hi MoRTH chuan One Time Improvement tih phalna ni 11.8.2025 khan a ti chhuak a. Hmun danga mite nena One Time Improvement thawhna tur hi Rs. 48.63 Crore a rawn sanction a.

Rang takin Draft Tender Document kan siam a, Ministry approval kan lak leh a ngai a, kan thawn a. An rawn approve hnuah Online Tender kan tichhuak leh a, a chhangtute Technical Bids chu kan endik vek hnuah Ministry lamten an endik ve leh a. Tender chinfel chhung kha a rei ta a.

Chutianga tih tur tulte kan tihfel vek hnuah chuan a chhang hniam ber M/s HES Infra Pvt. Ltd hnenah kumin ni 10.3.2026 khan Work Order kan pe a, fur ruahtui tlak hmaa thawk zo turin kan hriattir nghal bawk a. Anni pawhin an theih anga rangin hna hi an thawk ve nghal a ni. 

He kawng hi a lun a, a zawhtute hi Langkaih Balu phur, lirthei rit an lo tam si a, an siam chhun pawh kha an rah chhiatsak zel a, an sawt mawh khawp mai a. Fur ruahtuiin a nangching ta bawk si a. Ti hian kan awm zui ta a ni. Mamit SP lamin motor tlan hunbite a ruahman thar ta a. Chak zawka hna thawh theih kan inbeisei tawh a ni, a ti. 

Mamit district-a sorkarin hmasawnna hna a kalpuite a tarlang bawk.

Pu B. Lalchhanzova, FCS & CA Minister pawhin thusawiin, IGGL Project hnuaia Gas pipeline thawh mek chu nakkum February thlaah Sihhmui thlentir kan tum a. He pipe line hi a puitlin hunah chuan Hachhek tlang dung khuate hi Gas pipe connection kan pe thei turah kan inngai a ni, a ti. A department enkawlin Mamit district leh Hachhek bial tana hna an thawh langsarte a tarlang a. India ram huapa lawmman pakhatna dawng thei khawpa khawtlang tangrual Kawrthah North mipuite lawmpuina a hlan a ni.

Dr. Lalngura Tlau, Director, LAD chuan Kawrthah North in he lawmman ropui tak an dawn dan tlangpui a sawifiah a. Ministry of Panchayati Raj hian mumal takin Panchayati Advancement Index (PAI) hmangin India rama VC tinte inelna a kalpui a. PAI data lut atangin khaw tinte an rawn endik ta a, Kawrthah North VC te hian data dik tak, a hmuna endik tlak ngei zel an lo thehluh avangin he lawmman hi an dawng ta a ni.

Kawrthah North-ah hian in tinin LED Bulb an chhi vek a, an VC hian ngaw nei tha hle mahse phun belh zel tur Thing tiak kuina Green House an nei a, kumtin an phun belh a. In tinin LPG Connection an hmang a, Plastic bawlhhlawh zawng zawng VC ten an lei (buy back) a, an khaw chhung a fai em em reng bawk a ni. 

Award lawmna inkhawm hi Pu Lalawmpuia Khiangte chuan a kaihruai a, Rev. PC Lalropuian hunserh a hmang a, Pu C. Lalbiakmawia, VCP chuan kal khawmte lawmna thu a sawi a ni.