Vawiin khan Kulikawn YMA Hall sak zawh thar chu Chief Minister Lal Thanhawla’n a hawng a. He hunah hian Bialtu MLA Col.Z.S.Zuala leh ex-MP Pu Vanlalzawma te pawh an tel ve a ni.

 

 

Khuallian Chief Minister chuan Kulikawn Veng-in rahbi thar duhawm tak a neih avanga a lawmpui thu a sawi a, YMA Hall changtlung tak thalaite tan intihhlimna tur hmun tha tak leh khawtlang tana malsawmna a nih theihna turin duhsakna a hlan a ni. Tunhma chuan Kulikawn Veng chu Aizawl Veng zinga pawimawh ber, sumdawngte awmkhawm tamna Veng a nih thin thu sawiin Pu Hawla chuan  Aizawl-Lunglei kawngpui siamthat te, Falkawn Referral Hospital te leh cheng vaibelchhe  680 senga Akyab, Burma hmuna lawnglian thlenna tur hmun khuar a nih tur te avangin Mizoram chhimlam tan kawl a eng tan tawh a, chung zingah chuan Kulikawn Veng ngei pawh hmasawn tur zingah a tel pha dawn a ni, a ti. Kristian zaa za tia inchhal ngam Mizoramah eirukna a hluar chu a inhmeh lo hle a, hlemhletna tibo tur leh khawtlang nun siamtha turin sorkar leh mipuite chu mawhphurhna kan intawm a ni, a ti bawk. Kut tling lova sum lakluh hnial lo tam tak an awm laiin Pathian tih mi, dikna duh mi tam takte chu Mizoram tan beiseina leh innghahna an ni a. Mizo faten an tih ve theih reng hna chi hrang hrang ramdang miten inhlawhna atan an hman hi a tlawmngaih thlak a ni tiin Khuallian chuan khawtlang leh sorkarah chauh innghat lovin mahni theuh inenlet a, ngaihtuahna thar nen kan ram siam kan tum tur a ni, a ti bawk. YMA chu veng tinah kan hman tangkai a ni a, khawtlang leh mimal ten faina leh thianghlimna lamah hma an sawn theih nan tan la zel turin a chah a ni.

Hall hawn puala Kulikawn YMA Souvenir ‘RUN MAWI’ tlangzarhtu ex-MP Pu Vanlalzawma pawhin thu sawiin YMA Hall-ah chuan tupawh an leng tur a ni a - kohhran emaw, tlawmngai pawl hrang hrang leh political party thleng pawhin an leng vek tur a ni, a ti. Hmasawnna rawn kal zel turah Mizote chu inpuahchah thiam a tul dawn a ni, a ti bawk.

Bialtu MLA Col Z.S.Zuala pawhin thu sawiin vengchhung mi tlawmngaite leh khawtlang mipui an tanrual thiam avangin hetiang hall tha tak an nei thei chu lawmawm a ti a, khawtlang hmasawnna tura an veng tanrual thiamna chu entawn tlak hle a ni, a ti.

Vawiina Kulikawn YMA Hall hawnna inkhawm hi President Pu Laldawngliana’n a kaihruai a, Secretary Pu F.L.Chhuma’n report kimchang a pe bawk. Kulikawn YMA Hall hi naktuk atangin a duh apiang tan hman hawh theih a ni dawn a, vawi khat hman manah Rs.800/- bithliah a ni.