Chief Minister Pu Lal Thanhawla chuan vawiin chhun khan Assam Rifles Lammual Stadium Gallery leh Lighting system hawngin, 68th Senior National Football Tournament for Santosh Trophy 2014 North East Zone Qualifying Tournament a hawng nghal.

Chief Minister chuan hetiang rampum huap Santosh Trophy Qualifying football tournament hlutawm tak Mizoramin kan thleng thei hi a ropuiin a lawmawm hle a ni a ti a. Mizoram chanchinah chanchin thar duhawm tak, thil ropui leh hmasawnna chak tak lantirtu a ni a ti a. Hemi thleng thei tura Mizoram Football Association (MFA) hmalakna chu fakawm tiin lawmthu a sawi a. An inpekna leh thahnemngaihna te chhuanawm a tih thu sawiin kan zavaia tanrualna vang a ni a ti. Stadium gallery thar chu mipui ten dimdawi taka enkawl tura chahin, Mizote hi kuhva ei hnam kan ni a, chuvangin kan eina hnu chilte chhak mai mai lo tur leh chinaite tat mai mailo turin mipuite a ngen nghal a; thianghlimna leh faina hi kan vawn nuna kan uar deuh deuh a tul a ni a ti. Inkhel entute chu an tan lamte hawihhawm taka tan thiama, team dangte tana hnawksaklo turin a chah bawk a ni.

Inkhelh hma hian MFA President Pu Lalthanzara, Health Minister pawhin thusawiin,Mizoramin hetiang tournament a thleng hi Mizoram tan bung thar a ni a ti a. MFA hotute hmalakna avanga AIFF in tournament Mizorama an rawn nghat chu lawmthu sawiin, infrastructure buatsaihtu sorkar chungah lawmthu a sawi bawk a. Inkhel tura North East State pasarih, Sikkim tiam lovin, leh Railway atanga lokal zawng zawngte chu alo lawm bawk a ni.

AR Lammual Stadium Gallery leh Lighting System hi UD&PA Department enkawlna hnuaia sak niin, April 2011 khan hna thawh tan a ni a. Kumin 2014 January a zawh anih khan a vaiin Rs.1041.50 Lakhs sen a ni a, Mizoram sorkar in Rs.250 Lakhs leh Central sorkar in Rs.791.50 lakhs an tum a ni.VIP Gallery ah hian chairs 200 dah a ni a, inkhel entute thutna galleries ah fixed chairs 2200 dah a ni bawk. Hei bakah hian gallery hnuaia cement a siam thutnaah leh thlang lam thutnaah mi 7600 vel thut theihna a awm bawk a ni. Zana inkhel chhuneng tu tur High Mast 4 dah a ni bawk a, Diesel generator 250 KVA dah ni bawkin, hengte bakah hian inthiarna leh room hrang neuh neuh 11 a awm bawk a ni.

Inkhel turte hi group hnihah thenin, team li ve ve an awm a, group a a chak ber pahnihte hi national levela qualify tur an ni ang. Vawiin a hawn ni a inkhel teamte hi Mizoram leh Nagaland an ni.

Hawnna inkhawmah hian Minister, Speaker, Parliamentary Secretaries, MLA leh official thahnem tak an tel a ni.