Geology & Mining Resources Minister Pu H. Rohluna chuan vawiin khan Meidum-a ONGC Drilling site a tlawh a. He hunah hian ONGC hotuten lo dawngsawngin kum 2011 atanga Meidum rama Oil zawn hna an thawh dan kimchang leh vawiin ni thlenga an thlen chinte chipchiar takin an lo hrilh a ni.

Pu H. Rohluna chuan ONGC hotute chu an hna kal zel dan tur a thara duanna, routine fel tak siam turin a hrilh a, chu chu a hnena a copy pe tur leh an thawh chin apiang monthly report pe tawh turin a hrilh a. An hnathawh dawna Mizoram sawrkar nena MOU an ziah pawh a thara en ho leha, zawm tur awm apiangte zawm nise tiin a hrilh a.,An hnathawh tihkhaw tlaia a awmloh chu a duhdan a nih thu sawiin Pu Rohluna chuan an tihtur apiangte chak taka bawhzui tur leh harsatna an tawk a nih chuan a hnena thlen thin tura hrilhin a tul ang apiangah amahin Centre dawr a ngai a nih chuan a puih dawn thu pawh a hrilh a. Sawrkar chuan an thawh dan uluk lehzualin a vil tawh dawn a ni, a ti. MOU bawhchhiatna an nei a nih chuan chu pawh chu a ngaizam dawnlo tih sawilangin an hna chu a chak thei ang bera bawhzui turin a hrilh a ni. Minister tawiawmtu Pu Joseph Lalhimpuia, Par. Secy pawhin ONGC hna thawkte chu an thuthlung zawma MOU anga an kal tha a tih thu leh a theih ang chin china Mizo thalaite hnathawk tura chhawr tul a tih thu a sawi a ni.

Meidum hmuna Oil & natural gas zawn hna hi ONGC chuan 1.2.2011 khan lei verhin an thawk tan a.Tun dinhmunah lei chhung 3859 mts a thuk an verh tawh a. Lei chhung 3287 – 3292 mts. a thuk an verha an test naah hydro carbon (gas) an hmu a. 3309- 3316 mts.a thuk an verh thlenah pawh hydro carbon hi an hmu bawk a ni. ONGC te hian lei chhung verh tura an target chu 4300 mts a thuk a ni a. Amaherawhchu tun dinhmunah lei chhung verha leilung hausakna tak tak khawl hmanga zawn hna (Hydro fracturing ) ti tura ONGC tih theih bak an thlen tawh avangin Hydro fracturing ti tur Foreign Company-ah tender an ti chhuak mek a. Company pahnih in tender hi an chhang tawh a. Kumin November thla thleng tender hi an hawng rih phawt dawn a ni. Meidum hmunah hian gas hi 2.28 billion Cubic Metres vel awm ngei tura an ngaih thu ONGC hotute hian Minister leh amah tawiawmtu Pu Joseph Lalhimpuia, tehi an hrilh a ni.

ONGC ten an thawh tur hmabak nia an sawi Hydro fracturing ti tura thiltih ngai zinga an sawi kawng sial leh hemi atana tender tihchhuah te, Environmental clearance te chu tun dinhmunah an mutan langsar zual a ni a. Hlawhtling taka Gas hi lak chhuah a nih chuan Mizoram mai nilo, India ram tana rotling tur a ni.

Minister hi Dr. H. Lallenmawia, Director, Geology & Mining Resources Department pawhin a tawiawm a ni.