Chief Minister Pu Lal Thanhawla'n nimin khan Tuipuiral Zirlai Pawl General Conference vawi 32-na Leisenzo, Champhai District ah neih chu khuallian niin a hmanpui a, East Tuipui bialtu MLA leh Mizoram Youth Commission Chairman Pu T. Sangkunga pawhin he hun hi a hmanpui a ni.

Chief Minister Pu Lal Thanhawla chuan thalai leh zirlai te pawimawhna te hriain Sawrkarin thalai te tan khawvel thar buatsaihna kawngah theihtawp a chhuah mek thu a sawi a. Infiammna lamah te, zirna tha leh chhawrtlak zirlaite chherchhuahna kawngah te, sipai lamah officer thlenga thalaite a tam thei ang ber an luh theih nan te, mahni kea dinga eizawnna an neih theih nan te, Mizoram Youth Commission kaltlanga thalaite tan ram pawna eizawnna kawng hrang hrang dapna kawngah te Sawrkarin hmalakna hrang hrang a neih mek thu sawiin heng te hi thalaite hmakhuana tur a ni a, in chhawr leh in hman tangkai kan duh a, chuvangin heng ruahmanna chhawr ngei turin tumna in neih kan duh a ni, a ti.

Chief Minister chuan ama tawnhriat thil hrang hrangte sawiin zirlai ten an nu leh pate thuawih a, aia upa zahna te an neih chuan naktuk naktipah an ni hi khawtlang, Kohhran leh ram hruaitu leh nghahfak te an ni dawn a ni, a ti a. Taimakna atana hriselna a pawimawh dante sawiin Chief Minister chuan zirlai kalkhawmte chu thianghlimna ngai pawimawh a, mahni inthununna nei a, ei leh in ah insum a, zuk leh hmuam ah te fihlim turin a chah a. Cancer leh HIV/AIDS ah Mizoram dinhmun chhuanawm loh hi ngaihtuahin he thil hi zirlaiten veia ngaihtuahna seng turin a ngen a, hengte hi Mizoramah a vei an tlem theih nan midangte zirtira, theih tawpa an theihna apianga tan la a, midangte entawntlaka  awm turin zirlai te hi a chah a ni.

Mizo tawng a hausak leh a mawi thu sawiin tawng hi kan uluk a pawimawh a, tunlai thalai te hian kan tawng hman dan avangin kan tawng hausakna hi kan ti chhe mek em tih kan ngaihtuah chian ka duh a, kan tawng tih hausakna kawngah tan la turin zirlai te hi ka duh che u ni, a ti a. Tunlai zirlai naupangte ah tumna (ambition) fumfe tak neia zir an tam lo nia a hriat thu sawiin a hniam a ni emaw, a sang a ni emaw zirlaite hian tumna (ambition) in neih a pawimawh a, tumna mumal tak neia zirna kawng zawh hi thil tha tak a ni, a ti a. Chezia (manners) leh hawihhawmna kawng (etiquette) hi mihring nunah thil pawimawh tak anih thusawiin, heng te avangin miten min hmuh vawikhatnaah ngaihdan an siam thin a chuvangin hengte hi ngai pawimawha in nunah senglut turin ka chah duh che u ni, a ti bawk.

He programme ah hian Tuipuiral Zirlai  Pawl in an member zirna kawnga hlawhtlingte puala chawimawina thuziak an buatsaih chu Pu Lal Thanhawla, Pi Lal Riliani leh Pu T. Sangkunga ten zirlai ti tha te hnenah an hlan bawk a ni.

Zirlai te programme a hmanpui hmaa hian Leisenzo khawtlangin Chief Minister hi ropui taka lawmin vantlang inkhawm tawite an buatsaih a. Vantlang inkhawm ah Pu Lal Thanhawla'n Zo hnahtlak te inuanau tih chak te, inlaichinna tha zawk neih te leh inpumkhatna nghet zawk neih a pawimawh thute sawiin thlahtu te atangin inla hrang thei kan awm lova, inpumkhatna rilru kan put hi thil pawimawh leh tul tak a ni, a ti a. Mizoram hi Zo hnahtlak te Jerusalem a ni a, nu le pa nih tling lo mah ila, rilru zau tak pua nu leh pa tlin kan tum a tul a, hetiang tur hian kan rilru leh kan ngaihtuahna te kan hman a ngai, a ti a. Ram leilung fate zingah a neitu bik kan awm lova, neitu nihna leh mawhphurna inchen nei vek kan ni a ti bawk a. Pathianin min hunna theuh hi duhsak taka kan mihringpuite rawngbawl turah min dah a ni tih hi kan pawm a, chumi rilru pua khua leh tui tha niin kan phak tawk angin midangte tan malsawmna kan nih theuh a pawimawh a ni,  a ti bawk.