Chief Minister Pu Lal Thanhawla chuan vawiin khan Lunglei Sikuti Hall a Ethics Committee-in a tum hnihna, ‘Rorelna Dik’ tih thupui hmanga Seminar a buatsaih chu a hmanpui.

Chief Minister chuan kum 2008 inthlanna dawna Zoram mipui ten an tawngtai hla ber, rorelna dik, rorelna fel leh rorelna tha a taka a awm theih ngeina turin, rorelna diklo leh fello lakah an tlukluh loh nan anmahni vengtu turin Ethics Committee chu din a ni a ti a. Rorelna diklo awm chhan chu cancer anga min eichhe mektu, corruption, sorkar sum eirukna a ni a ti a. Sorkar sum eiruk ringawt hi corruption a nilova, dawngdahna te, thatchhiatna te, kuttling lova sum lakluh duhna te leh zawmthawtna te hi corruption vek a ni a ti. Chief Minister chuan ethics kan tih hi a huam zau hle a ni tiin, MLA zawng zawngte hian ethics zawm tur kan nei vek a, chu chu Speakerin a kengkawh a ni a ti a. Ethics Committee hian tawngkam mawi hman tur an hrilh thin thuah lawm thu a sawi a.Ethics Committee chu huaisen taka thawk tur a ni tiin, Chief Minister chuan sorkar atanga hamthatna leh thuneihna an neih loh thu leh mahni inpekna, voluntary veka thawk an ni a ti.

Eiruk chungchangah Chief Minister chuan a zung kan phawi chho mek a, a phoro lam pawh a theih chin chinah kan phoro a ni a ti a. Hemi ti tur hian keimahni lampang kan fihlim angai a, Pathian khawngaihna in kan fihlimin kan hria a ti a. Criminal case neia, charge sheet te chu judiciary lam ngaihtuah tur a ni a ti a. Rorelna dik, rorelna fel leh roerelna tha awm tur chuan langtlang sorkar kan nih angai a ti a. Chumi awm thei tur chuan RTI Act hi taima tak leh dik taka kan hman tangkai a tul a ni a ti. Mizoramah RTI Act hi kan hmang tangkai tawk lova a hriat thu a sawi bawk a ni.

Chief Minister chuan sorkarin hmasawnna hrang hrang a kalpui mek te sawiin, project lian tham kan neih thenkhat, Zoram chhimlama Bay of Bengala chhuahka kan neihna turah tuna Lawngtlaia atanga Myanmar ram paltlang tur motor kawngpui siam mekah leh chumi kaihhnawih, a thuphunga pawm tawh, Sairang atanga Lawngtlai thleng rel kawng siam turah compensation itna avangin a thuanawp mai ang tih a hlauhthawn thu a sawi a. Diklo taka compensation lak tumna in Tuirial Hydel Project a tih thuanawp ang khan heng project lian kan neih mek leh neih turte hi a bawhzui theih loh palh mai ang tih a hlauhthawn thu a sawilang a ni.

Seminar thawhkhatna hi Pu H. Raltawna, IAS (Rtd) kaihhruaina hnuaiah Rev C. Rosiama paper, ‘Rorelna Dik Bible in a zirtir dan’ tih chu sawiho a ni a. Seminar chhimtute an phurin thusawitu thahnem tak an awm a. Thawhhnihna hi Rev Dr.K. Thangzauva kaihhruaina hnuaiah Rev.C. Lalsangliana paper, ‘Rorelna Dik - Mizoram ah’tih chu sawihona neih leh a ni a. Thusawitu thahnem tak an awm bawk a ni.

Seminara tel tur hian sorkar hnathawk UDC chunglamte chu phalna pek an ni a. An ni bakah hian kohhran hruaitu, school zirtirtute leh college lecturer te, tlawmngai pawl hrang hrang atang teh MJA Lunglei tatangte in member thahnem tak an tel a. Saikuti Hall lian takah hian seat luahkhat vekin mi an kal tha a ni.

Chief Minister hi a nupui Pi Lal Riliani bakah Pu Lalsawta, Education Minister, Pu P.C. Lalthanliana, Minister of State for Social Welfare, Parliamentary Secretaries Pu K.S. Thanga leh Pu S. Laldingliana, Pu Lalrobiaka, Chairman, ZIDCO leh Pu Joseph Lalhimpuia, Vice Chairman, Lunglei HPC ten an tawiawm a ni.