Nimin ni 19.4.2010  khan Chief Minister Pu Lal Thanhawla chuan Chanmari Hall sak tur Lunglei-ah a lungphum a phum

 

 

 

 

Chief Minister chuan he Hall sak tur atana sum ruahmanin a daih lo anih pawhin sum hmuh zelna tur a huphurhawm loh thu a sawi a. Lunglei khawpui leh a chhehvel khua ten an tangkaipui tur he hall sak tur hian nasa taka thalaite infiamna lama hma an sawn phah ngei a beisei thu a sawi a, thalaite hi ram hruaitu tur an nih avangin kawng tinrenga hmantlaka chherchhuaha, hamthatna pek hi kan tum a ni a ti. Hemi a thil tul pawimawh ber zirna siamtha turin Education Reforms Commission pawhin hna a thawk mek a ni a ti a. Mizoram chhim miten an mamawh em em thlawhnaa inkalpawhna tur Kawmzawl-a Airfield siam tur pawh NEC atanga sum beisei mek anih thu sawiin kum hnih khatah zawh theih a beiseiawm a ni a ti. Airport dang siam tuma thlithlai mek Saitluk Airport tur chu enfiah anih hnuin Lengpui Airport pawh a tluk dawn loh avangin hmun dang en a tul dawn a ni a ti. Pu Hawla chuan Zobawka Sports Academy din dan sorkar laipuiin Rs.32.00 crores a rawn pek tawh thu a sawi a. Lunglei Infrastructure siam nan Rs.1367.53 lakhs sorkar laipui atanga hmuh anih tawh thu a sawi bawk a. Lunglei-ah Convention Hall-te, Contact Sports Centre-te leh miretheite chenna tur In unit 500 sak tur te pawh tunah hian bultan theiha a awm tawh thu a sawi bawk a ni.

He hall sakna tur hmun hi Chief Minister hian kum 1990 December thlaa a lo pek tawh a ni a, hall sakna tur hi Rs.368.00lakhs ruahman a ni a, mizopa chhiarin chhawng thum tur 2315 sqm-a lian a ni ang. A hnuai ber ground floor hi motor parking tur a ni a, a dawt leh hi office, dormitory leh inthlakna room leh zunin te a ni ang a, a chhawng sang ber chu basket ball court emaw, volley ball court emaw, badminton court emaw khelh theihna tur hmun a ni ang a, inkhel entu mi 400 chuang an thu thei bawk ang.

Chief Minister hi a nupui Pi Lal Riliani bakah UD & PA Minister Pu Zodintluanga leh HPC Lunglei Vice Chairman Pu Joseph Lalhimpuia ten an tawiawm a ni.