Vawiin khan Chief Minister Pu Lal Thanhawla chuan Mat Lui chhehvela leilet leh huan chawmtu tur, Mat Minor Irrigation Project chu Mat Lui kam a Irrigation & Water Resources Department Site Camp-ah khuallian niin a hawng. He hunah hian Pu K.S. Thanga, I&WR Minister chu khualzahawm a ni a. He Irrigation Project hi Accelerated Irrigation Benefits Programme (AIBP), Ministry of Water Resources atanga sum hmuh (90:10) hmangin I&WR Department-in a thawh a ni.

Chief Minister chuan kum rei tak atanga lo nghah tawh Mat Minor Irrigation Project hawn a ni ta chu lawmawm a tih thu sawiin, hlawk zawka buh leh bal thar tur chuan agriculture kalpui dan pawh a ngheh a ngai a, chumi atan chuan irrigation a pawimawh a ni, a ti a. WRC te, Terrace siam te a hautakin tha leh sum sen a ngai nasa thin a, a chawmtu tur tui supply tha a pawimawh bawk thu sawiin, chutianga ke pen theih a tura Mat Irritation Project duan chuah chu hman theih a lo nih takah farmer engemawzah a chhawk zangkhai phah ngei a beisei thu a sawi. Chief Minister chuan state dang nen khaikhin chuan Mizoram chu tui hrim hrimah chuan ruahtui te kan dawng tha in, tui hna kan nei tha a; Kan ngaihtuah zawk tur erawh heng kan malsawmnate hi kan humhalh in kan hmang tangkai em tih a ni, a ti.

Chief Minister chuan Technology thiamna tello chuan hmasawn a har thu leh, vawiina Mat Irrigation Project pawh a hawnnah tawp mai lovin a enkawl zui zelna a pawimawh. Project hi daih rei tur chuan helai zaua hmangtute an tanrual a an thawhho thiam a pawimawh thu leh, hamthatna awm thei ang ang an hmuh theih nan association anga an tih tur tul te pawh bawhzui vat turin a chah. Mahni kutke ngeia din tluk a awmlo a ni tiin Chief Minister chuan sawrkarin bul tha taka a tan tawh chu a chhunzawmna chu a hmangtangkaitu a neitute mawh a ni tih hre that turin kalkhawmte a sawm a ni.

Khualzahawm Minister Pu K.S. Thanga pawhin thu a sawi naah vawiina irrigation project hawn tak chu hmalam hun lo kal turah kuthnathawktute tan tangkaina leh hlawkna thlentu a nih dawn avangin a lawm thu a sawi a. I&WR Minister chuan Mat Irrigation Project chu irrigation project dang lo awm tawhte aiin danglamna chu tuilakna chuan hnuailam chauh nilovin a chhak lam amite pawhin tuilak an dawng ve thei tur chu a ni, a ti a. A chawm zat zauh turin Phase-II thawh theih dan ngaihtuah zel a nih tur thu a tarlang bawk. Sawrkarin hma la in, Mizoram khaw hrang hrangah chhungkaw tui lak awlsam zawk nan leh, lo leh huan a tui mamawh phuhruk turin project hrang hrang kalpui a nih thu a sawi a, chung hmalaknate hi tangkai taka hman dan mipuiin thiam a tul a ni, a ti. Kuthnathawktute tangkaipui turin tui luangin leitha a len ral mai loh nan te, tuilakna kawng thawm that leh adang mamawh hrang hrang awmte chu NEDP kaltlanga sukiang turin sum a awm thu a sawi a. Department pawhin thil te nau chauh nilo lian tham zawk ngaihtuah tura chah in, Department thawh rah chu kuthnathawktute tel tur a nih avangin sawrkar hmalakna te chu tha taka tawiawm a, hmang tangkai turin kuthnathawktute chu Minister chuan a sawm tel bawk a ni.

Mat Irrigation Project hi a project cost chu Rs. 554 lakhs niin, agriculture ram hectare 176 a zau chawmin, chhungkaw 44 in an chhawr thei dawn a. Tui kawng hi dawh belh zel theih niin, Phase 2 thawh theih a nih chuan a vaiin Hectare 515 a zau a chawm thei dawn a ni. Tui kawng hi chi hnih a siam niin, tuilian in chin phak metre 805 a thui chu RCC in siam a ni a, a bak zawng metre 2620 a thui chu PCC floor & Bricks Walling Trapezoidal Channel a siam a ni. Tui kawng chunglam pawh ni zung chakna hmangin emaw "lift irritation" a lak theih a ni dawn bawk a, chumi atan chuan Bypass Channel panga (5) siam a ni. He project hnuiaha hian fur hun laiin tui 2.47 litres/second/hectare supply thei tura ruahman niin, thal lai chuan 1.58 litres/second/hectare supply thei ve thung dawn a ni.

Vawiin Mat Minor Irrigation Project hawnna inkhawm hi Pu H. Lalengmawia, I&WR Deptt. Secretary chuan kaihhruaiin, Er. Lalrotluanga, Chief Engineer, I&WR Deptt. chuan report a pek bakah he project chhawr tur ber, Mat Minor Irrigation Project Water User Association (Thliarpui Area) aiawhin an Chairman leh Secretary ten thu an sawi bawk a ni. Vawiin programme ah hian Serchhip DC, SP, leh I&WR Deptt. thawktu thahnem tak an tel a ni.