Chief Minister Pu Lal Thanhawla chuan vawiin chawhma khan Mizoram Legislative Assembly Conference Hall-a Mizoram Civil Service Officers te tana Mizoram sorkar DP&AR leh Mizoram Civil Service Association tangkawp ina Workshop an buatsaih a hmanpui.

Chief Minister chuan MCS Officers te chu sorkar neitu dik tak leh sorkar innghahna ber an nih thu sawiin, an hnathawhnaah kut fai tak leh kut tling taka thawk turin a chah a. Workshop-a sorkar flagship programme NLUP chu an zir ho tur bera chhawpchhuah a ni chu a lawmawm hle a ni a ti a. NLUP chu miretheite khaichhuahna tur hmanrua anih piah lamah ramngaw siamna tur te, boruak tha, environment thianghlim siamna tur te anih bawk bakah tui hna hunhalhna tur leh ram pum economy siamna tur te a ni tiin, central sorkar pawhin tha a tih thu leh United Nations Food and Agriculture Organisation pawh ina a hriatpui a nih thu a sawi a. USA a University of Minnesota mithiamte pawh ina an rawn zirchian a ni a ti.

Chief Minister chuan sorkar ngaipawimawh ber pathumte zingah hausa leh rethei inkar tih zima, mipui ten lei rem an rah a, khaw eng an hmuh hi kan duh ber pakhat a ni a ti a. Chumi atan chuan NLUP chu a hmanruaah kan hmang a ni a ti a. A hlawhchham a thianglo a ni tiin, a hlawhtlin ngeina turin a dawngtute rinawmna, dikna,taimakna leh Pathian tihna a pawimawh a, sorkar hnathawkte chu a kaihruaitu tur an nih avangin mawhphurhna an nei bawk a ni a ti a. A line departmenta thawkte phei chu mahni kutzungtang an hriat chian angin an bel tur a ni a ti. Tun an sorkar chhunga a dawngtu tur mi 1,35,000 ten a hlawhtlinna an hmuh vek dawn loh avangin a enkawl chhunzawm nan ‘exit protocol’ pawh duan nghal a ni a ti. Chief Minister chuan thalaite tan khawvel thar siam chu an ngaihpawimawh dang pakhat a ni tiin, an talent cho chhuak turin kawng hrang hrang, infiamna lam te, zirna in sang zawk din te leh sipaia a tam thei ang ber an luh theih nan hmalak anih thu a sawi bawk a. Mizote min eichhetu, eirukna corruption tih bo chu sorkar ngaihpawimawh dang leh a ni tiin, Chief Minister chuan sorkar sum eiruk ringawt hi corruption a ni lo a ti a. Corruption tih hian mahni hnaa tui loh te, tlemte thawha tam tak lak tum te, kuttling lova sum lak pawisak lohna te, thatchhiatna te, vantlang tana hnawksak nih te hi a huam vek a ni a ti. Chuvangin MCS Officer te chu a chhelai siam thatu ni a, midangte tana malsawmna ni turin rinawmna, taimakna,dikna leh Pathian thina nung nen kal tura chahin, an hlawh ang hu an thawk em tih inenchiang thin turin a chah bawk a ni.

Workshop hi Pu K.Lalthawmmawia, President, MCSA in a kaihruai a. NLUP Implementing Board Chairman Pu R.Selthuama leh Vice Chairman Pu P.L.Thanga te tel bawkin, Panel of Experts Rev Dr.K.Thanzauva, Dr. James L.T.Thanga, Asst Prof, MZU leh Pu Vanlarema Vantawl, Vice President, MJA ten hun an hmanpui bawk a ni.