Ni ruk chhung awh tur, Film Division, Government of India leh Directorate of Information & Public Relations, Government of Mizoram tangkawpin a buatsaih Mumbai International Film Festival (MIFF) in Mizoram chu vawiin khan Chief Minister Pu Lal Thanhawla chuan I&PR Auditorium ah a hawng.

Chief Minister chuan Mizoramah film festival hmasa ber Mumbai International Film Festival hawng theia buatsaih a ni chu a lawmawm takzet a ni a ti a. Hetiang Kutpui Union Minister for Information & Broadcasting Pu Prakash Javadekara’n ni 22 August 2014 a New Delhi ah North East Film Festival alo buatsaih tawh chungchangah lawmthu a sawi a. Tun tumah Union I&B Ministry, Film Division in Mumbai International Film Festival Mizoramah a rawn buatsaih leh hi a ropui hle a ni a ti a. MIFF hi film tawi leh animation film lama kutpui changkang ber, khawvel huap pawha chhuanawm tling a ni a ti a. ‘Union I&B ministry chungah lawmthu kan sawi rualin, ram inpumkhatna ti nghettu a nih ngei ka beisei tlat a ni’ Pu Hawla chuan a ti.

Chief Minister chuan kum 20 chhung Mizoram chu rambuai anih avanga hmasawnna ruhrel siam kawngah a hnufum phah hle a, state dangte, a bikin film siamna lamah phei chuan kan umphaklo hle a ni a ti. Hmunhma tha leh kawng dik kan neih phawt chuan Mizote hi kawng tam takah a ber kan ni thei a ni Chief Minister chuan a ti a.Film lam leh Art lam tih hmasawnna kawngah sorkar chuan theihtawp a chhuah reng a ni a ti. Mizoramah hetiang kut hmasa ber, international film festival rawn buatsaihtute chungah lawmthu sawiin, hun an hman tur zawng zawng a hlawhtlin ngei theihna turin duhsakna a hlan a ni.

Union I&B Ministry atanga lokalte hi Pu V.S. Kundu, IAS, Director General, Film Division in a rawn ho a.Pu V.S. Kundu hian thuhma a sawiah India sorkarin mipuite inhriat tawnna leh inpawhna tha zawk a awm theih nan kum 1948 khan Film Division leh Photo Division siam a nih thu sawiin, commercial film nilo, documentary, film tawi leh animation lam film te siam thin a ni a ti a. Kum 1990 chho ah MIFF hi lo piangin, kum hnih danah zel neih thin a ni a ti a. Tuna MIFF hi kumin February thla a neih a nih thu sawiin, film thlan bikte pholan a ni a ti. Film Divisionah hian film siamtu hmingthang tak takte pawhin bul tan nana an hman thin thu a sawi a.Thalai a tam thei ang ber ten talent an neihte chherchhuah nan Film Division hi hmang se a duh a ni a ti a. Pu Kundu chuan training pawh nei hmasa loa Mizote zingah film siam lama talent tha tak tak nei ten phur tak maia film an siam chu fakawm a tih thu a sawi a.He kutpui chhunga workshop an neih turah midangte zirtir thei tur khawpa film siam kawngah te, sound designing ah te leh editing lamah te thiamna zirtir tum a ni ang a ti a. Hetiang hmalakna hi Aizawlah kumtin neih tum a ni a ti.

I&PR Secretary Pi Rosangpuii pawhin thutawi sawiin, Mizo thalaite zingah film siam thei talent tak tak nei an awm a ni a ti a. Cinema hall te neilo mahila film lama tuimi te hi thlawpna leh kaihhruaina tha an mamawh a ni a ti.

MIFF hawnna inkhawm hi Pu Jim K.Chozah, Director, I&PR in a kaihruai a. Hawnna inkhawm zawhah hian hawnna film Chengrang Lanu (Lady Musket), Malsawmkima Chhangte siam chu chhuah a ni a.Film festival hi ni 20 September 2014 thleng neih tur a ni a, nitin zing dar 9 atanga chawhnu dar 2 thleng film making workshop leh film show neih thin a ni ang. Festival chhung hian film thlan bik India film 21(Mizo siam film 6 tiamin), Hongkong, Bangladesh, Azerbaijan leh UAE film pakhat theuh chhuah a ni dawn bawk a ni.