167/2023-2024

Aizawl, 20.4.2023 : Chief Minister Pu Zoramthanga chuan vawiin khan MIGASTU (Mizoram Govt. Ad Hoc Aided School Teachers' Union) Inkhawmpui lian, Vanapa Hall a buatsaih chu khuallian niin a hmanpui. School Education Minister Pu Lalchhandama Ralte chu he hunah hian khualzahawm a ni. MIGASTU hnuaiah hian Mizoram khaw hrang hrangah High school 129 leh Middle School 64 awm mekin, thawktu mi 1300 an awm mek a ni.

Chief Minister chuan hun reilo te ah ad hoc school thenkhat chu provincialise tum a nih thu a sawi a. MIGASTU pawlin sawrkara an thil beisei an thlen te chu a theih leh remchan dan ang zela a hlawhtlinna tur dap a nih thu sawiin, ad-hoc aided school te provincialise chungchangah chuan sum dinhmun zirchiang zel chungin school provincialise tura hmalakna hi a tahtawl zel a kalpui tum a nih dan a sawi a ni. Chief Minister chuan hripui leng leh beisei lawk loh - khuarel chhiat te, thenawm rambuai avangtea state in harsatna a tawh dan leh state sum dinhmun in a tawrh phah thu te sawiin, chung zawng zawng karah chuan tha thlah lova hmasawn nan theihtawp chhuah zui zel a nih dan a sawi a. Ram hmasawnna atan hmathlir tha neih a pawimawh thu Chief Minister hian sawi bawkin, Mizoram pawhin ram hmangaihna tak tak nen hmathlir - tum ram nghet tak nen a hmalam a pan zel a pawimawh thu a sawi. Chief Minister chuan Mizoramin zirna kawnga hma a sawn zelna tura mawhphurtu pawimawh berte zing ami zirtirtu kalkhawm chu tha thlah lova thahnemngai taka hna thawk chhunzawm zel turin a chah.

Khualzahawm Education Minister Pu Lalchhandama Ralte chuan sawrkarin zirna tihhmasawnna tura a hmalakna hrang hrang sawiin, sawrkarin zirlaite leh zirtirtute hmakhua a ngaihpawimawh thu a sawi a. Education huang chhunga association hrang hrangte nen thawhhona tha tak neih theih zel a ni chu lawmawm tiin, sawrkar pawhin sum dinhmun tha tawklo tak chungah pawhin a remchan dan ang zela an hmakhua a ngaihtuah zel thu a sawi. School Education Minister chuan zirtirtu kalkhawm chu an zirtirte tana entawntlak ni zel turin a chah bawk a ni.

Vawiin MIGASTU inkhawmpui hi an Vice chairman Pu Lalmuanchhunga chuan kaihruaiin an Chairman Pu Lalzirliana leh Mizoram Teachers' Federation (MTF) Chairman Pu Rosangzuala Ralte te'n thu ans awi bawk a. General Secretary Dr. K. New Israela chuan report pe in, Secretary Pu Lalpuangliana chuan lawmthu sawiin hun a khar a ni.