501/2023-2024

Aizawl, 19.05.2023: Chief Minister Pu Zoramthanga chuan tukin khan Tlawng kawnga Mission Veng Kristian Thlanmual hmun chu tlawhin, a panna kawng siam ngai te a hmunah a enpui.

Thlanmual panna kawng kilometre chanve vel a thui kawng siamthat ngai chu SASCI (Special Assistance to States for Capital Investment) sum atanga thawh tura ruahman niin hna tan thuai pawh beisei a ni.

Chief Minister chuan Aizawl khawpui chhim lam vengte chu ram hmasawn zelah a pawimawh belhchhah zual zel tur thu a sawi a. Khawtlang hmasawnna tur ruahman kawngah hmathlir thui tak nei a, thangthar zelte tana tangkai leh mamawh tur te ngaihtuah chunga hmalak pawimawh a tih thu a sawi. Chief Minister chuan Mission Veng thlanmual chu biodiversity site lam hawia siam tel an tum chu tha a tih thu sawiin, kawng siam hmabak pawh chu tha taka an thawh ngei a beisei thu a sawi a ni.

Chief Minister hi Mission Veng khawtlang hruaitute leh tlawmngai pawl hruaitute'n an lo dawngsawng a. Vengchhung hmasawnna hna hamchhawp an neih te an sawipui bawk a ni.