Vawiin chawhnu khan Chief Minister, Pu Lal Thanhawla chuan Mizo Students’ Union (MSU) dincham vawi 16-na (Rising Day) lawmna Vanapa Hall-ah a hmanpui.

Chief Minister chuan thalaite chu ram leh hnam tan an pawimawh thu sawiin, nu leh pa thuawiha, aia upate zahna chang hre turin leh Pathian tiha mi rinawm leh dik ni turin a fuih a. Thalaite chu naktuk maia hnam leh khawtlang tana mi tangkai, kan ram ti thanglian leh suihkhawmtu an nih ngei a beisei thu a sawi a. Hetiang chherchhuak tur hian MSU lakah pawh beiseina sang tak neih a nih thu a sawiin an hnathawhna leh hmalakna hrang hrang fakawm a tih thu a sawi. Pu Lal Thanhawla chuan India ram mipui chanve dawn chu thalaite annih thu tarlangin, sawrkar pawhin an hma khua ngai pawimawhin an tan zirna, infiamna, thiamna hrang hrang ah te hma alak nasat thu a sawi a. Hnam hrisel tak kan lo nih theih nan thalai kalkhawmte chu ei leh in, zuk leh hmuam kawngah te tun aia nasa zawka mahni in vawng turin leh kan hnam zia chawinung zel turin a chah bawk a ni.

Zirlaite chu ram tan leh sorkar khalh ngil tur hian an paiwmawh hle thu sawiin Chief Minister chuan mahni culture leh tradition an chawikannaah lawmthu sawiin mahni culture te hmusittu hnam reng reng chu an dingchhuak ngai lova, kan hnam hi eng kawngah mah hnamdangte lakah hmuhsitawmin kan siam tur a ni lo tiin zirlaite chu ngaihtuahna fim hmanga politics ah an zilaite tibahlah khawpa buai lo tur leh hnam hrisel ni thei tura ei leh in, zuk leh hmuamah insum thei turin a ngen nghal bawk a ni.

MSU General Headquarters President, Pu RB Lalmalsawma pawhin thu sawiin MSU thupui chu ‘Bul tan that chuan rah tha a chhuah’ a ni a ti a. Zirlai, ram leh hnam tan theihtawp chhuah zel an tum thu a sawi bawk.

MSU hi February Ni 12, 2001 khan din niin tunah hian General Headquarter 1, District Headquarters 3 bakah Sub-Headquarter 28 a awm a ni.

He lawmna hi MSU Gen Hqtr Vice President, Pu Benjamin Lalnghaka chuan kaihruaiin hruaitu hlui leh adviser famta te sunna leh MSU hruaitu lo ni tawh te chawimawina thilpek hlanna hun hman a ni.