Vawiin khan Finance Minister Pu Lalsawta chuan I&PR Auditorium – ah SIMsePAY (mobile wallet) a tlangzarh. He hunah hian Health & Family Welfare Minister Pu Lal Thanzara chu Khual Zahawm niin PACS Documentary Film a tlangzarh nghal bawk a ni.
Finance Minister chuan SIMsePAY (mobile wallet) chu Smart Phone hmang lo leh internet connection neilo te tan pawha mobile phone pangai hmanga indawrna, leh pawisa inthawn theihna (digital banking services) anih thu sawiin phone tha lei theilo te tan leh hmun kilkhawr zawk internet connection thatlohna hmuna awm te tan a tangkai lehzual tur thu a sawi a. Sawrkar laipuiin Cashless Economy kalpui tura hma a lak mekna nen pawh a inhmeh hle tih Pu Lalsawta chuan a sawi bawk.
He hunah hian Finance Minister chuan kan ram hausakna atana mamawh zawng zawng - lei/ram, ruahtui, sik leh sa nuam tak, hnathawk tur mipui kan neih thu a sawi a. NEDP kaltlangin thlai thar tam te, a hralhna tur zawn leh company te nena sumdawnna insuihzawm te State GDP tihsan chhoh leh kuthnathawktu te hnathawh tur mumal ngaihtuahsak leh tih hausak chu sawrkar in a tum ber a nih thu Pu Lalsawta chuan a sawi bawk a ni.
Pu Lal Thanzara Health & Family Welfare Minister chuan he hunah hian Primary Agriculture Credit Cooperative Societies (PACS) Documentary Film a tlangzarh a. Minister chuan PACS hmalakna te chu fakawm a tih thu sawiin, hmun kilkhawr zawk Bank la awmlohna hmunah Bank ang chiaha sum khawlna, Deposit leh Loan te an lo pechhuak thin chu lawmawm a tih thu a sawi a. Sawrkar in kuthnathawkte a ngaihpawimawh thu leh chawikan na atan program a duan NLUP leh NEDP hnuaia hmalakna hrang hrang te PACS hnathawh nen a kalkawp chu tha a tih thu a sawi bawk. Tun aia nasa in PACS hi kut hnathawktu te, Pawl leh Kohhran pawhin an hman tangkai zel a beisei thu Pu Lal Thanzara chuan a sawi a ni.
SIMsePAY hi Mizoram Cooperative Apex Bank leh YES Bank tangkawpin siam a ni a, He mobile wallet hmang hian Apex Bank account neite tan mobile phone eng chi pawhin internet connection awm lohna hmunah pawh phone signal hmangin khawi hmunah leh engtik hunah pawh banking transaction an ti thei dawn a. SIMsePAY atan hman tur Wafer SIM hi Apex Bank Branch atangin Apex Bank Account neite tan a thlawnin a lak theih a ni.
Mizoram hmung hrang hrang ah Apex Bank hnuaiah PACS 26 din tawh niin, Teikhang PACS – ah bik hian depositor 293 an awm a, Loan mi 128 hnenah pekchhuah tawh a ni. SIMsePAY leh PACS Documentary Film tlangzarhna hi Pi T. Lalmuanpuii Chairman, Mizoram Cooperative Apex Bank(MCAB) in a kaihruai a.
SIMsePAY hman dan tur zirtirna presentation IT Cell (MCAB) leh YES Bank chuan neiin, Pu Lalzuahliana Chief Executive Officer (MCAB) in lawmthu sawina in hun a khar a ni.
