Vawiin khan Chief Minister Pu Lal Thanhawla chuan National Bank for Agriculture and Rural Development (NABARD) in lo neih leh a kaihhnawiha eizawngtuten bank-a sum an puk dan dinhmun leh hemi kawnga Mizoram a bank tena sum an puk tir theih dinhmun (credit potential) sawihona State Credit Seminar 2017-2018, Aijal Club ah an buatsaih chu a hmanpui a, he hunah hian NABARD in District hrang hrangte Potential Credit Linked Plan siam kaikhawmna report State Focus Paper 2017-18 a tlangzarh bawk a ni.

Chief Minister Pu Lal Thanhawla chuan Mizoram economy chu loneia innghat agriculture based anih avangin hmasawnna atana sawrkar in a ngaihpawimawh ber chu loneitute dinhmun chawikan a ni a mahse agriculture leh allied sectors-a thawk ten bank atanga sum pukna kawnga harsatna an tawh leh bank ten sum puk tur an bithliah tlem chu economy than zelna daltu lian tak pakhat a ni, a ti a. NABARD buatsaih Mizoram State Focus Paper-a loneia eizawngte chawikanna atana an thawhchhuah a leta a pun nana hma lak an tum thu Focus Paper ah tarlan ani chu lawmawm tiin hei hi NLUP leh NLUP chhunzawmtu NEDP te thil tum ber a nih thu a sawi a. Agriculture leh allied sector-te tih hmasawnna atana NABARD in sum an thawh leh an puk tir a bik takin Refinancing Scheme leh Self Help Group Programmes chu mipui leh sawrkarin kan tangkai pui hle a, Rural Infrastructure Development Fund (RIDF) kaltlanga thingtlang kawng sial hna te, tui tlanna leh zau leh leileta tuikawng siam hna te, tui leh lei hnawng humhalhna hna thawh te hian hmasawnna a thlen tir zela, kan hlawkpui hle a ni, a ti bawk.

Chief Minister chuan CD Ratio chungchang sawiin Ram pumah bank ten mipui hnena sum an puk tir (credit) leh mipuite hnen atanga sum an vawn nan sumfai an dawn (deposit) khaikhinna Credit to Deposit Ratio (CD Ratio) za zelah 72 anih laiin he dinhmun hi Mizoram ah za zelah 39 vel ani hi bank tam zawk ten mipuite hnenah an puk tir tur bituk RBI in za zelah 60 a phut a tlin loh avangin bank te tan tan lakna tur a awm a ni a ti a, mahse chutih rualin mipui lam atangin pawhin bank ten sum puk tir an inhuam thei nan project kan siam te hi belhchian an dawl a ngai a ni, a ti a. NABARD ah State Sawrkarin loneitute dinhmun siamthatna atan thawhpui tha tak a hmu chu lawmawm a tih thusawiin Mizoram hmasawnna atan theihtawp chhuahpui turin a sawm nghal a ni. Focus paper ah solar leh renewable energy te, ruah tui dahkhawlna kawng (water harvesting), handloom leh handicrafts te bakah ei leh in sawngbawlna (food processing) an ngaipawimawh chu lawmawm a tih thu a sawi bawk a ni.

He Seminar hmanpuitu dang Finance Minister Pu Lalsawta pawhin thusawiin loan la a rul tha apiang an dingchhuaka, a rul tha lo te zawk hi an pamtul thin anih tih hi kan hriat a pawimawh a, NABARD kaltlanga Rupay Kisan Credit Card te tangkai taka loneitute an hman thei nan kan tihlar leh hrilhriat a tul a, loneitute te sum puk tur mamawh hi bank ten theihtawp chhuahin in ngaihtuah sak tur a ni, a ti. Chief Secretary Pu Lalmalsawma chuan tunlai khawvel thang zelah Entrepreneurship Development a pawimawh dante sawiin NEDP hnuaia thalai te ten eizawnna kawng an neih theih nan Entrepreneurship Development Scheme chu duan anih thu a tarlang.

Thuhma sawitu Pu D. K. Mishra, General Manager, NABARD Regional Office, Mizoram chuan an bank in Mizorama hma an lak dan te tarlangin Mizoram hmasawnna kawnga Mizoram Sawrkar leh mipuite thawhpui chu nuam an tih thu te an phur thu leh Sawrkar programme thar NEDP chu tha an tih vangin, a theihna apainga an bank chuan sawrkar an thawhpui duh thu te a sawi a ni. NABARD Deputy General Manager Pu J. Suresh’n Focus Paper sawizauna hun hmang a. Pu Rualkhuma Ralte, Manager, Lead Bank SBI chuan CD Ratio dinhmun te tarlangin RBI in loan pek zawng zawng atanga agriculture tana loan pek tur za zelah 18 a bithliah laiin Mizorama bank ten agriculture tana loan pek hi an loan pek zawng zawng atanga chhutin zelah 11 vel a ni, a ti. ICAR Kolasib Scientist Dr. T. Boopathi chuan kum 2022 thleng Mizoram loneitu te sum thawhchhuah a leta tihpun nana thil tha leh kawng 14 an zirchian te sawiin ‘Doubling of Farmers Income by 2022 in Mizoram’ tih thupui sawiin hun an hmang bawk a ni.

State Focus Paper hi NABARD hian kum tin a buatsaih thin a, District hrang hrang te Potential Credit Linked Plan te khaikhawmin state credit potential te tarlan ani thin a, kum 2017-18 chhung hian Mizoram credit potential chu vaibelchhe 1083.73 nia tarlan a ni a, hemi atanga vaibelchhe 427.88 chu Agriculture leh kaihhnawiha sum puk thei ‘Credit Potential for Mizoram’ a ni.

NABARD in January 2017 thleng project hrang hrang atana sum a pek hi vaibelchhe 731 tling tawh a, Kum kal mek 2016-17 chhung hian vaibelchhe 153.10 hu man Rural Infrastructure tan sum a sanctioned tawh a. Aizawl, Lunglei, Kolasib, Mamit, Champhai leh Serchhip a loneitu 4500 te hlawkna turin Farmers Producers Organization (FPO) 15 din ani thei nan nuai 135.90 a sanctioned a; Champhai, Mamit, Lawngtlai leh Kolasib a KVK te an thawpuiin loneitute hamthatna tur programme an kalpui mek a. Tribal Development Project 4 chhungkaw 1650 te huam tur cheng vaibelchhe 7.07 an sanctioned a, kumin hian hetiang project thar 2 chhungkaw 500 huam tur cheng vaibelchhe 2.47 hu an sanctioned dawn a. Hei bakah hian MCAB leh MRB te pawh kawng hrang hrangin an thawpui mek bawk an ni.