Vawiin Mizo zirlai 46 Japan rama lehkha zir paha eizawnna mumal tak nei tura kal tur te chuan Chief Minister Pu Lal Thanhawla chu Chief Minister’s Conference Hall-ah an hmu a, heng zirlai naupangte hi kawng engkimah an nun uluk turin leh Mizo hnam tan missionary an ni tih hre reng turte in a chah a. Kokoro College-in heng zirlaite ‘Care Giving Course’ a an luh phalna entry permit a pek chu he hunah hian Chief Minister in zirlai naupangte hi a hlan nghal bawk a ni.

Chief Minister Pu Lal Thanhawla chuan Kokoro College in hetianga Mizo thalai tana ruahmanna tha tak an siam chu lawmawm a tih thu sawiin thalai Japan rama kal tur te chu Mizo hnam tan missionary an ni tih hre reng turin a chah a. An zirnaah te, an hnathawhna turah te leh an khawsakzia ah te rinawmna, taihmakna, dikna leh Pathian tihna nung nen engtikah mah thlahthlam lo turin a hrilh a. An chhawrtu tur te laka lungsi taka awm turin leh an kalna apianga Mizo Ringtu nih lantira, an thil tih reng reng chu Pathian duh dan leh a duhzawng a ni em tia ngaihtuah a, eng hna pawh thawk ila, A mi hunna apiang hi a Rawngbawl tura min dahna ani tih hi hre reng turin thalaite hi a fuih a ni.

Chief Minister in Kokoro College, Nagasaki, Japan in heng thalai 46 an College a luh phalna a pek entry permit chu he hunah hian a hlan bawk a ni.

He programme hmang tura lo kal Kokoro College Chairman, Pu Joji Iwanaga chuan Mizoram sawrkarin Mizo thalaite Kokoro College a Japanese tawng zir tur leh chumi hnua tar enkawlna hmuna thawk tura Japana tirh a remtih avanga he ruahmanna hi a awm thu sawiin phur taka Mizoram Sawrkar in he ruahmanna hi a dawnsawn avangin Sawrkar leh Chief Minister chungah lawmthu a sawi a. Thalaite chu taima taka an course zir tura fuihin an tih that chuan Japan ramah an tan hma lam hun a eng tur thu a sawi.

He hunah hian Pu Hirosuke Takemoto, Head – International Students, KMS, Kitakyushu, leh Pu Isaku Mori, Operations Head, South Korea and Japan leh he ruahmanna buaipuitu Pi Zampuii, Pu Subha Bhattachan, President, Silver Peak Global Group leh a thawhpui Pu Pritam Thapa, Director, North Eastern Edu Consultants leh Pite an tel bawk a ni.

Batch hmasa thalai 14 te chu Japan ramah tawng zirin an awm mek a, tuna batch te hi batch hnihna niin thalai 46 in thla thum chhungin Aizawl-ah Japanese tawng an zir a, chumi hnua entry permit hi pek chauh a ni. Mizo thalai te hnenah hian an zir chhungin inhlawhna siam sak an ni dawn a, an zir zawhah tar enkawlna hmun ‘Aged Care Home’ ah hna an thawk dawn a ni.