Vawiin chawhnu khan Lunglei Convention Centre-ah Cleanliness Week 2016, faina hapta kharna inkhawm neih a ni a, Pu Zosangliana, MPS, Lunglei SP chu Khuallian a ni.

Pu Zosangliana chuan faina kawngah Lunglei District in hma a sawn in, sawrkar, tlawmngaipawl leh kohhran te thawh hona tha a tih thu a sawi a. Faina hapta khar a nih ruala kan inthlahdah ve nghal chuan a tum thelh dawn a, inelna hrang hrang buatsaih a nih vang chauha thahnem ngailo in, nitin a kan chin than atan a pawimawh a ni, a ti a. Faina chu intihluihna anga ngai lo tur leh midang tih atan dah lo in, faina kawnga hma kan sawn zel a tul a ni, a ti. Sawrkarin hma a la a, a la mek zel dawn a, chutih rualin mipuiten kan mawhphurhna kan hlen ve a ngai a ni, a ti bawk.

Lunglei DUDO Pu Andrew Lalhruaia chuan faina hapta hman dan report pe in, sawrkar office, primary, middle, high school leh a chunglam, khawchhung VC area 24-ah te faina inelna neih a nih thu a sawi a. Education-a thawktute, Sub-Hqrs YMA, Lunglei; MJA, Lunglei VC Association leh Clean Lunglei te endiktu atan ruat an nih thu a sawi. Hei bakah hian thuril tawi (slogan) inphuahsiak leh extempore speech ah te inelna neih a ni bawk.

EE, PWD, Road Division; Zotlang Primary School-I, Rahsi Veng Middle School-II, Nursing School, Lunglei leh Sethlun te chuan heng inelnaah hian pakhatna an la a. T. Lalthianghlima, Ramthar Veng leh Zodinpuii Chhakchhuak, HATIM ten slogan inphuahsiak leh extempore speech ah pakhatna ve ve an la bawk a ni.