Vawiin chawhma khan Lunglei DC Conference Hall-ah October ni 5-12, 2016 chhunga hman tur, RTI Week 2016 hawnna neih a ni a, Pi Saizikpuii, MCS, SDO (Sadar) chuan hawnna programme hi a kaihruai a ni.

Pi Saizikpuii chuan ram changkang apiangah information a zalenin, khua leh tuiten an chanvo leh dikna an hria a. Mizoramah pawh RTI Week hman tan a nih atangin, mipuiin an chhawr tangkai in, an chanvo leh dikna te an hriat phah a ni, a ti a. Khua leh tuiten a hranpa a information an dil a ngaih loh nan leh RTI Act in a beisei angin, he dan hnuaia public authority-te chuan sawrkar hmalakna puangzar tura tan lak an ngaih thu a sawi a, sawrkar hun leh tha tul lo ah hman ral a ngaih loh phah dawn a ni, a ti.

Lunglei DIPRO Pu Vanlalmuana, MIS chuan keynote address a pe a, Pu R. Lalrochama, Associate Professor, Govt. Lunglei College chu resource person atan ruat a ni. RTI chungchang inzirtirna neih a nih bakah zawhna leh chhanna hun hlawk thlak tak hman a ni a, Lunglei District tana tan lak ngaihna te an sawiho bawk.