Vawin (7.10.2016) chawhnu dar 1 khan BNRGSK Hall, Lawngtlaiah Lawngtlai District Legal Services Authority buatsaih School Level Essay Writing Competition result puanna leh lawmman semna hun hman a ni.
He hun hi Pu ST Ramhmachhuanmawia, Advocate chuan a kaihruai a. Lawngtlai District Child Protection Unit-a Councellor Pi Zohlimpuii Hmar chuan naupangte dikna chanvo (Child Rights) chungchang sawiin, World Vision India (Chhimtuipui ADP) Programme Manager Pu Paul T.Touthang pawhin naupangte talent hai chhuahsak chungchang leh Wold Vision-in naupang a enkawl dan chungchang a sawi bawk.
Hemi hnu hian Govt Lawngtlai College-a Asst Professor Sissy Zampuii Zote kaihhruaiin result puan leh lawmman sem hun hman a ni. He Essay Writing Competition-ah hian primary sikul atangin essay thupui "The things that make your parents special" tih chu naupang 91-in ziakin, Jabithy Lalchansangi, Downtown English School chu pakhatna a ni a. Middle sikul-ah thupui "The type of person you want to be" tih chu naupang 207-in ziakin, Vansangpuii, Downtown English School chu pakhatna a ni bawk.
High sikul tan thupui "Who are your most influential people and why" tih chu zirlai 90-in an thehlut a, B.Lalthakimi, Donbosco School chu pakhatna a ni a. Higher secondary zirlai tan thupui "Why you can succeed in life" tih chu zirlai 6-in thehlutin, pakhatna hi VL Hmachhuansangi, Jehova Jire Higher Secondary School a ni a. College level atan thupui "If you could start a charity" tih chu zirlai 2-in thehlutin, Lalhrilmawia, Govt Lawngtlai College chu pakhatna a ni.
Essay hi English, Mizo leh Hindi-a ziah theih vek a ni bawk. Lawmmanah hian pakhatna te hian pawisa fai cheng singkhat leh certificate an dawng a; pahnihna hian cheng sangsarih leh certificate dawngin, pathumnain cheng sangnga leh certificate an dawn vek bakah, consolation prize hi section tinah mi 10 hnenah cheng sangkhat theuh pek an ni bawk.
Lawmman semna hun hman zawh hian Lawngtlai Chief Judicial Magistrate Pu Laldinpuia Tlau chuan lawm thu leh fuihna thu sawiin, hun a khar a ni.
