Vawiin (7.10.2016) chawhnu dar 2 khan Lawngtlai DC Conference Hall-ah Faina Hapta 2016 kharna hun hman a ni a. Lawngtlai Chief Medical Officer Dr Thani Pachuau chuan a kaihruai.

He hunah hian Lawngtlai DC Dr A. Muthamma, IAS chuan thu sawiin, Mizoram chu India rama state fai berte zinga mi a ni a, khawlaia bawlhhlawh paih mai mai pawh an awm ngai lo tiin, Mizote chu inchhuang hle tur kan nih thu a sawi a. Chutih rualin, India ram faina beihpui thlak (Swachh Bharat Mission) thil tum tihlawhtling turin chhungkaw tinin inthiarna tha leh thianghlim an neih a tul a ni a ti. District pum chu zun leh ek thlahdah an awm tawh lohna (open defecation free)-a siam turin mipuite a sawm a. VC te pawh an veng chhunga hma la tura chahin, zirna in te paw’n inthiarna leh kut silna tur tha tak an neih vek a tul thu a sawi bawk.

Lawngtlai Joint VC Association ai awhin Secretary Pu K.Laldinmawia pawhin thianghlimna pawimawhzia leh, faina kawngah sawrkar hma lakna chauh thlir lo va, mi tinin mahni mawhphurhna kan hlen theuh a tul thu a sawi bawk. He hunah hian sawrkar office hrang hrang hotu lute, VC leh NGO hrang hrang ai awh bakah, zirtirtu leh zirlaite an kal tha hle. Vawiin hian Faina Hapta 2016 hman chhunga office, zirna in leh veng fai thlan chhuahte leh, milem leh thu inziahsiaka ti tha zualte hnenah DC chuan lawmman a hlan nghal a.

Lawmman dawngtute chu, office fai berah SP Office; zirna in fai berah Govt Model English School; veng fai berah Lawngtlai Vengpui; lem inziahsiak Middle School level-a thiam ber S.Lalruatkimi (VIII A), Donbosco School; High School level-a thiam ber Oliver Lalthanzuala (IX), Downtown English School leh Higher Secondary School leh College zirlaite tana buatsaih thu inziahsiaka ti tha ber Laltluangkimi Pachuau (XII Arts), Govt Region Higher Secondary School te an ni.