Vawiin chawhnu khan Chief Minister Pu Lal Thanhawla chuan Integrated Cooperative Development Project sum Rs 125 Lakh senga sak Mizoram State Cooperative Marketing & Consumers’ Federation Ltd(MIZOFED) Office, New Secretariat Complex-ah a hawng.

MIZOFED Office hawngtu, Chief Minister Pu Lal Thanhawla chuan mipui rawngbawlna hmuna thawk zawng zawngte chuan an hnathawh chu sawkar hna a ni emaw corporation a nih pawn eizawnna atana hna satliah thawk ni lo in mipui tana thawk an ni tih an hriat a ngai a ti. 

Department anga Building leh hmunhma tha tak takte mahmawhna avanga sak thar a ni mek zel leh mamawh belh a ni zel chu hmasawnna tarlangtu a ni tih a sawi a. State ang pawhin Mizoram in hma a sawn nasa hle a, hmasawnna tehnaah pawh India rama hmasawn ber 4 zinga a Mizoram a tel chu thil chhuanawm tak a ni a ti. NITI Aayog thlirlawkna ah chuan Mizoram GSDP chu tun Financial Year chhungin double digit % in a pung chho dawna a phurawm hle a. Hmasawnna kawnga nawrkaltu zinga mi ni turin MIZOFED leh Cooperative Societies hnuaia society tin te pawh tan an lak chhoh zel a ngai a ni a ti.

Chief Minister chuan inpekna a nasat phawt chuan a thawktu tlem mahse ram leh hnam tan thil nasa tak an thawk thei tih sawiin Mizoram sawrkar hnuaia Corporation pakhat pawh a thawktu 100 chuang a nih lai aiin tunah a thawktu 10 chuang awrh anih hnuah hma an sawn zawk a ti. Cooperative society te phei chu mipui nena inngheng reng leh a te ber atanga a lianber tana thawk an nih angin thahnem ngaihna leh hmasawn tumna nen an tan mar pat reng a tul thu a sawi a. Lehkhathiam tamna Mizoram angah phei chuan Cooperative movement a hlawhtling awlsam bik a ni a ti. Thingtlangmite chawikanna kawngah cooperative society te mawhphurhna a san leh zual thu a sawi a. Chief Minister chuan MIZOFED Office thar chu a thawktu te tan phurna thar petu ni tur te,  mipui tana office dawrnuam ni tur te leh a hawnni anga office fai ni reng tur te in beisei a ni a ti.

Thusawitu dang, Cooperation Minister Pi Vanlalawmpui Chawngthu chuan an Department in building thar thatak an nei chu lawmawm a tih thu a sawi a. Building thar chuan hmasawnna nasa zawk nei tura tanlakna tumna rilru te thlenga a chhunga thawkte zawng zawng hnenah a thlen ngei a beisei thu a sawi a ni.  Cooperation Minister chuan cooperative society hnuaia society tin te chu mipui tana hnathawk leh mipui rawngbawltu an ni tih inhrechiang tura chah in MIZOFED hmasawnna pawh mipui tan hmasawnna a ni tel nghal a ni a ti a. Cooperation Department hnuaia hnathawk zawng zawngte chu primary cooperative societies - thingtlangmite tan tang leh zual turin a chah a ni.

Vawiina Chief Minister in a hawn tak, MIZOFED OFFICE len zawng hi Square Metre 904.43 a ni a; chhawng ruk a sang niin chhawng thum sak zawh tawh a ni.

MIZOFED Office hawnna inkhawm hi MIZOFED Chairman Pu K.Laldawngliana’n  a kaihruai a, Supply Minister Pu John Rotluangliana bakah sawkar leh society hotuliante pawh an tel a ni.