Vawiin khan I & PR Minister Pu Lal Thanzara hovin Indian Film Festival Mizoram 2018 buatsaihtute, he Festival-a lo tel Bollywood Producer-te, Mizorama film siamtu leh film lama tui mi sawmbikte chuan Indian Film Festival Mizoram 2018 pualin Covention Centre, Berawtlang-ah Panel Discussion an nei.
Pu Lal Thanzara chuan Mizoram hmunhmate, tlang leh luite chu film shooting, tourism leh adventure sports atan a rem thusawiin he Festival-a lo tel Bollywood producer te chu Mizorama film shooting rawn nei thin turin a sawm a, an ti duh phawt dawn chuan Mizoram sorkar pawh a inhawng hle ang, a ti. I-League inelnaa Aizawl Football Club hlawhtlinna leh an chanchin chu Bollywood producer-ten bengkhawnin, Bollywood producer Pu Tarun Rathi leh director Pu Neeraj Pathak te chuan AFC dawrin film siam an tum thu Pu Lal Thanzara chuan a sawi a. Mizorama lirthei horn hmeh rik hriat tur awm mang loh chungchanga film tawi ‘Tranquility’ chu social media-ah a darhzauvin a lar hle a ni tih tarlangin Minister chuan film hmangin Mizoram chanchin tha lam, ram chhung hmun dang mipuiten an hriat chu thil lawmawm tak a ni a, hei tak hi film thiltihthei zia chu a ni, a ti. Film hmangin India hmun dang leh hmarchhak te chu an inzawm that zawk a beisei thei tih sawiin Minister chuan Bollywood producer-te chu hemi lamah an ngaituahna seng turin a chaha, vawiina Panel Discussion neih chuan ngaituahna thar Mizoram tana hlawk tur a chhuah ngei a beisei thu a sawi bawk.
Panel Discussion-ah hian Planning Secretary Dr. C. Vanlalramsanga chuan Mizoram chanchin kimchang tak a lem nen a sawifiah a. Bollywood producers lar – Pu Rahul Mitra, Pu Umesh Shukla leh Shahnaah Alam te chuan an ngaihdante sawiin Mizoram chu film shooting nan a rem thute, Mizoram leh mipuiten an rilru a khawih tih thute, Mizorama lo zin chu nuam an tih hle thute sawiin film shoot nan ngaituahna chauh nilo a taka hmalak an tum thu an sawi a, hemi atan erawh Mizoram sorkar chuan policy tha tak a siam a tul dawn a ni tih an sawi. Gujarati film siamtu Pu Mikhil Musale chuan mahni tawnga film siam a pawimawh tih sawiin Mizorama film-a tuimite chu puih a inhuam thu a sawi a. Assamese film star Pi Zerifa Wahid pawhin film hmangin hmarchhak chanchin mi tam zawk hnenah a hrilh theih thu a sawi a ni.
He Panel Discussion-a tel ICFAI Vice Chancellor Lt.Gen.(Rtd.) A.K.Mishra chuan kum khat chhunga Mizoram leh Mizo miputen a rilru an hneh dante sawiin producer-ten Mizoram rambuai hun khirh takte chu thawnthu tha tak hmangin film hmuhnawm tak an siam theih thu a sawi bawk.
