NEDP Press Study Tour-a KMMTTP tlawh a kal Champhai DIPRO leh MJA Champhai District-te Champhai DC Pu Vanlalngaihsaka, IAS chuan vawiin khan a Pisa-ah a kawm a.  Press Study Tour a kalte hun hman dan tlangpui DIPRO Dr. Lallawmkima MIS chuan tarlanna a nei a.  Press miten an thil hmun dan tlangpui sawilanna an neih bakah rawtna an neihte an tarlang bawk.NEDP Press Study Tour a kal MJA Champhai District memberte hian January ni 15-28, 2018 chhung khan Multi-Modal Transport Transit Project an tlawh a ni.

Tour a kalten LADC leh MADC huamchhunga kawngpui kam thing an vawn leh enkawl that dan chu entawn tlak an tih thu tarlangin,  Champhai khawpui chhung VC huamchhunga mimal huan vat-in kawngpui kam   an vat chhuak chu ngaimawhawm an tih thu sawilangin,  dan bawhchhetute chungah hremna lek ngei tha a an hriat thu an tarlang tel bawk.

He inkawmhona-ah hian Champhai DC chuan Champhai District chhunga Silai leh Licence nei, DC Office-a la in report lo sang chuang an la awm tih sawiin, heng mite hian kumin March ni 31 thleng in report-na hun Sawrkarin a rawn pawtsei tih a sawi a. Hemi hun chhung hian in report ngei tura a duh thu a sawi bawk. Hun tiam chhunga in report lo tan chuan an silai Licence neih mek pawhin awmzia a nei dawn lo tih a sawi bawk a ni.

Inkawmhona hunah hian Seling leh Champhai inkar kawng siam tur chungchang te; Champhai khawpuiin eirawngbawlna Gas harsatna a tawh mek chungchang te sawiho a ni a. Hun remchang hmasa berah DC ho hian Champhai District chhunga sawrkar hmalakna hrang hrang fan leh tlawh chungchang te sawiho a ni bawk. Champhai DC Pu Vanlalngaihsaka, IAS hi Pu Lalremruata Kullai MCS, Election Officer, Pi Rebecca Laldinmawii Hrahsel MCS, SDC leh Pu Remlalliana Hnamte MCS, SDC ten an tawiawm a ni.