Vawiin chawhma khan Mizoram Legislative Assembly Annexe Conference hall-ah Social Wefare Department(SWD) in mithiam te ruaia damdawi hmansual a nih dan leh ruihhlo ngai te dinhmun zirchianna a siam, " The Baseline Survey on the Extent & Pattern of Drug use in Mizoram " chu Chief Minister Pu Lal Thanhawla'n a tlangzarh

The Baseline Survey on the Extent & Pattern of Drug use in Mizoram hi khawvel in a thatzia a hmelhriat tawh, Respondent Driven Sampling(RDS) behchhana zirchiangtute ten pawnlam a ruihhlo ngai te leh ruihhlo kaihnawih a lung in tang mi 2633 an kawmna atanga siam a ni a.  He lehkhabu tlangzarhna a rawn tel - ruihhlo kaihhnawih thil hmalatu department hrang hrang aiawh official te, Home/Centre enkawltute, Ruihhlo do kawnga hmalatu(social workers), Tlawmngai pawl, Kohhran hruaitute leh mi thahnemngai sawmbik te hnenah lehkhabu hi sem nghal a ni.

Mizoram a damdawi hmansual a nih dan leh ruihhlo ngai te dinhmun zirchianna lehkhabu  tlangzarhtu Chief Minister Pu Lal Thanhawla chuan SWD in hunrei tak atangin ruihhlo ngaite enkawl leh buaipui in hma an la tawh thin tih a sawi a. Mithiamte zirchianna behchhan, data an neihloh avang erawh chuan hmathlir thui tak nen ruahmanna an siam thei thin lova. International Expert hial rawih na chang hria a "The Baseline Survey on the Extent & Pattern of Drug use in Mizoram" siam a nih takah chuan SWD mai ni lo tlawmngai pawl hrang hrang leh sawrkar anga ruihhlo dona kawnga hmalakna chuan awmzia a nei chho dawn a ni a ti.

Ruihhlo do leh ruihhlo ngai te buaipui kawnga hmalatu lianber YMA in sawrkar leh kohhran hruaitute kawmna a neih tawh thu leh nasa taka Mizoram rawn run mektu ruihhlo do chu state pumah puan remtih tlan tawh a ni a ti a.  " Ruihhlo in min run a, min ti mangang tawh tih hi a chiang a, hmalatu zawng zawng ten kan in sawi uar siak emaw tih theih a ni a. Chutih laia manganna belhchhahtu chu ruihhlo zuartute man an nih in an tangrei thei lo hi a ni", a ti. YMA in ruihhlo a man te langtlang takin a halral thin thu sawiin sawrkar pawh an in enfiah a ngai a ti a. Sawrkar hotulian ten ruihlo halral tur khawlkhawm a nih chhungin an hnuaia thawk ten  pilril an zawng em tih thlengin an vil a ngai tan tawh  a ti a . Ruihhlo do kawngah kan zaa tan tlan, fimkhur tlan leh thawhho a ngai a ti.

Khawchhak ramri lehlam atanga ruihhlo tawlhtute chunga hmalak dan tur thuneitu ten an ngaihtuah mek tih a sawi a. A tul phawt  chuan Chin Hills Chief Minister leh "Chin Hills a kan Mizo unaute" thawhpui an ni ang a ti a. Ruihhlo ngaite enkawlna kawngah pawh hmasawn ngai lai a tam thu - a bikin kumtlinglo leh hmeichhia ruihhlo vanga talbuaite enkawlna bik te chu tih hmasawn ngai a nih thu a sawi a. Ruihhlo avanga manganna in tlawmngaih chhuah a  ruihhlo ngaite lo enkawltute thlenga beihna leh sawichhiatna a thlen chu a vanduaithlak tak zet a ti a. " TBCC leh Home/ Centre te hian ruihhlo ngaite rawn dah rawh u tiin min sawm lova, nu leh pa mangang ten an fate ruihlo avanga  buai leh an enkawl theih tawh loh an dah luh te tlawmngaiin engmah beisei leh phut nei chuang lovin an lo enkawl zawk a ni a. Heng home te tan ngaihtuahna, sum leh tha la senglo ten sawichhiatna chitin renga anni mi tlawmngai te an bei vak vak hi thil tih chi a ni ber em tia in enfiah ngai a ni", a ti a.  " Kan thiante in hmangaihna avanga a thlawnna rawng an bawlnaah hian tih theih ka nei ve em? An hnathawh tisawt turin enge ka tih ang? tih hi kan inzawhna tur zawk a ni dawnlawm ni?", tiin Chief Minister chuan ruihhlo ngaite enkawlna beih a ni leh thin chu pawi a tih thu a tarlang.

Chief Minister chuan ruihhlo tluk zeta Mizoram mipui suattu chu vaihlo zuk leh hmuam avanga natna chi hrang hrang a ni a, vaihlo leh a kaihnawihte  thlakhlelh pawh sim tur a ni a ti a. Ruihhlo do emaw hmachhawp hrang hrang ti hlawhtling tur chuan Kohhran, tlawmngai pawl leh sawrkar te pheikhai rual taka an kal za a pawimawh ber a ni a ti.

Thusawitu dang, Social Welfare Minister Pu PC Lalthanliana chuan Mizoram mai nilo, India ram pum huap ang pawh a damdawi hmansual a nih dan leh ruihlo ngai te dinhmun zirchianna lehkhabu Mizoram sawrkarin mithiam te ruaia a siam thei chu a vanneihthlak tih a sawi a.  Ruihhlo in mi thenkhat a ti buai a, ruihhlo tihbuai te chu midangin an buaipui leh avangin mitlemte chenna Mizoramah ruihhlo in a tihbuai loh an awm manglo a ti a. "Ruihhlo hian kan chhungkua a tibuai rih lo a ni mai thei e; kan kawngka erawh a dak reng tih erawh kan chiang vek awm e. Fate sualna avanga mi fate mawhpuh ching nu leh pa chuan an fate an siam tha thin lova. Chuvangin nu leh pa chan chang kohhran, sawrkar leh tlawmngai pawl te hian tumah mawh chhiat lovin lungthu kim a kan tan tlan a ngai a. Mi tin hian ruihhlo do leh ruihhlo ngai te tanpui hi kan mawh ah kan lak tlan a ngai" a ti.

The Baseline Survey on the Extent & Pattern of Drug use in Mizoram siamtur hian thla kaw(9) chhung hun hman niin District 8-ah  Researcher 32 rawih an ni a. Lehkhabu chhunga pawimawh langsarzual te tlangzarhna  International expert on substance(drug) Abuse Pu Debashis Mukherjee chuan a nei a. SWD Secretary Pu P. Lalchhuanga'n survey report zirchianna in sawrkar leh a thawhpui te tan tihtur a kawhhmuh te tarlangin Concern Department hrang hrang te mawhphurhna leh hmalakna tur nia lang te a sawifiah.

The Baseline Survey on the Extent & Pattern of Drug use chhunga inziak langsar deuh ruihhlo vanga buai mi 2633 zirchiana in a tarlan  te chu - 86.6% eizawnna neilo, a tam zawng atanga chhutin mipa aiin hmeichhe drug zuar leh ruihhlo leina tura mahni inzuar an tam zawk, Zirchian zingah hian vaihlo, heroin, damdawi mum ruihchi, nachhawkna, tuipawlh/hip a ruih theih damdawi  nghei theilo zingah mipa aiin hmeichhia an tam hret zawk a, zirchian zat  atanga chhut in Champhai district-ah inchiu thin an tam ber a.  Mi 2064 chhana atanga  78.6% mi 2064 zinga 1623 te chu an inchiu vawikhatnah an thian ten an chiu a, mi 2064 zinga mi 500 zet chuan midang hriau hman tawh sa an hmang a, Siaha district-ah inchiuna intawm tam berin 39.3% in inchiuna an intawm a, mi 2064 zinga 1069 te chuan an inchiu chhan chu an ruih nawm zawk an rin vang a ni. Mi 2064 zinga 651 chuan an inchiu hmasak ber dawn khan HIV an kai thei tih an pawm thlap a, mi 2064 zinga 559 te pawn an inchiu hmasak ber dawn khan Hepatitis -C an vei thei tih pawm thlap in an pawisa lem lo tih a lang a. Inchiuna intawm chhan lianber chu mahni puala inchiuna leh inchiuna hriau hran neih loh vang a ni.  Zirchianna atana rawn penchhuak damdawi khawih ching  mi 2633 zinga mi 1573 chiahin an damdawi khawih vanga enkawlna an nei a, Champhai district a mi ten inekawlna la tha berin Serchhip District a mi ten inenkawlna ngaihthah berin ruihhlo ngai mi 256 zinga 44 chiah in inenkawlna an dawng a ni a. Ruihhlo ngai te zinga an inenkawl loh chhan lian ber chu  inenkawl tul a an ngaihloh vang a ni. Mi 2633 zinga Ruihhlo kaihhnawih thil danbawhchhiatna a man chu 1174 niin  an zinga mi 386 chiah hrem an ni. Hremna tawk zinga 10.9 % chu damdawi hralh an ni a. Orverdose zinga 52.7% ten an  inchiuna atana an hman  an OD chhan chu Dextro-propoxyphene (proxyvon kaihnawih) a ni a, 47.9 % chu Heroin vanga OD an ni thung.  Damdawi khawi mi 2633 zirchian zinga  62.4% chu hmeichhiat mipatna hmang an ni a, 1.3% in an mahni anpui an kawp a, hmeichhiat mipatna hmang zinga 24.1% chiah mahni kawppui nghet hmeichhiat mipatna hmanpui an ni a. Kawppui nghet  ngei zinga 70.7% te hian hmeichhiat mipatna an hman dawn in condom an hmang lo a ni.

The Baseline Survey on the Extent & Pattern of Drug use lehkhabu tlangzarhna ah hi School Education Minister Pu H. Rohluna, Deputy Speaker Pu R. Lalrinawma leh SWD Parliamentary Secretary Pu K. Lalrinthanga bakah official te, tlawmngai pawl hruaitute  leh ruihhlo ngaite enkawlna kawnga mi inhmang tak tak te an tel a ni.