Ni li chhung awh tur Mizoram Official Taekwondo Championship vawi 20-na, Mizoram Amateur Taekwondo Association (MATA) buatsaih chu vawiin atangin Electric Veng YMA Hall-ah neih a ni. Minister of Information & Public Relations Health & Family Welfare, etc. Pu Lal Thanzara chu khuallian niin he championship hi a hawng.
Khuallian chuan Mizoram chu kum 20 chhung ram buai avanga hmasawnna kawngah hnufum deuh mah ila tunah chuan infiamna kawngah ngat phei chuan India hmarchhak state-te zingah ruhrel nei tha pawl kan ni tawh a ni tiin, hengte hi sorkarin infiamna ruhrel leh hmun hma tha tak a chhawpchhuah avangte leh, sports association hrang hrangte thawhhona chak leh that vang a ni, a ti a. Infiam miten ram pawn an fehchhuah nikhua a sports discipline hrang hranga hlawhtlinna duhawm tak an nei thin chu a lawmawm in infiam mite an chhuanawm tak zet a ni, a ti a. Hengte hi Sorkarin discipline hrang hrang hman tur bungrua a chhawpchhuah sak avang a tih theih a ni tiin, heng facilities neih ang chhun chhun te hi neitu thinlung pu a duat taka enkawl a hmang tangkai chhunzawm turin infiammite a chah bawk.
Health Minister chuan thalai infiammi te tan mahni inthunun a pawimawhziate, ei leh ina fimkhur a tulzia te, zuk leh hmuam leh ruihtheih thil laka fihlim a pawimawhzia te kalkhawm hmaah a sawi a. Nun uluk loh avanga HIV/ AIDS positive tam tak an awm thu te sawiin, hlawhtlinna an chan theih tur ang an chan ngei nan infiammite chu an nun uluk turin a chah a ni. Minister chuan infiamna hi medal lakna chauh a nih tawhloh thu leh, eizawnna tling, a bik takin Police, Sipai leh Paramilitary Force ang chi ah te hna laka duhsak bik an nih thin thu tarlangin, chungte chu hmang tangkai turin thalaite a chah bawk a ni. MATA hruaitute inpekna chungah Minister chuan lawmthu sawi bawkin, National leh International Level Championship hrang hranga Mizoram tan medal thahnem tak an lo hawn tawh zia leh an thawhhona tha tak chu infiammite tan entawn tlak a nih thu a sawi a. MATA puih nan MinisterPu Lal Thanzara chuan cheng nuai khat pek a tiam thu a puang bawk.
Vawiin championship hawnna inkhawm hi Dr. Rualkhuma Colney, MATA President chuan kaihruaiin, Electric Veng Local Council Chairman Pu Zorammawia chu he hunah hian special guest a ni.
20th Mizoram Official Taekwondo Championship-ah hian Mizoram hmun hrang hrang atangin team 58 an tel a. A vaiin player 478 telin, team official-te nen 505 an ni a. Inelna hi category pali – Sub-Junior,Cadet, Junior leh Senior-ah te then niin, heng category hrang hrang chhungah hian weight category engemawzat siam leh theuh a ni a. Championship-ah hian Category hrang hranga gold medalist-te chu ‘Medalist among Medalists’ zawng turin an inel leh dawn bawk a ni. Technical official 15 te kaihhruaina hnuaiah inelna hi kalpui a ni dawn a. Tun tum Special Taekwondo Championship-ah hian participant zinga naupang ber chu hmeichhe naupang kum 3 mi a ni.
