Mizoram Bharat Scouts & Guides 14th State Rally, 2020, State Training Centre, Tanhril a February ni 24 atanga neih tan chu tukin khan Chief Minister Pu Zoramthanga chuan a khar.

Khuallian Chief Minister, Mizoram Bharat Scouts and Guides President ni bawk Pu Zoramthanga chuan kum sawm hnu ah Mizoram Bharat Scouts & Guides ten State Rally an nei leh thei chu a lawmpui thu a sawi a. Chief Minister chuan scouts leh guides te chu an rally atang chuan inunauna leh inhriatthiam tawnna te an zirchhuah a, an upat hun thleng pawha a tha zawnga an nun tidanglamtu a lo nih ngei a duhsak thu a sawi a. An hma hun zelah harsatna te pawh tawk mahse tumruhna nen engkim an hneh thei a ni tih sawiin, kan dinhmun thlak theilo mah ila keimahni kan inthlak thei a ni tih a hrilh a ni. Chief Minister chuan he rally a Scouts & Guides kalkhawm te chu zialzuk, zu leh ruihhlo laka fihlim tura chahin, zirlai 409 te pawh chuan fihlim turin an iniam bawk.

Thalaite tiphur tura hmalak chu sawrkarin a ngaihpawimawh zing a mi a nih thu Chief Minister chuan sawiin, Scouts and Guides tana activity buatsaih bakah NSS ah te, NCC leh infiamna lamah te pawh activity hrang hrang ruahman chho zelin, a remchan dan ang zelin state chhung mai nilo India hmarchhak state leh ram pum huap thlenga Mizoram in a host theih dan ngaihtuah a nih tur thu a sawi bawk.

He huna khualzahawm Sports Minister Pu Robert Romawia Royte pawhin Scouts & Guides te tan state pum huapa rally neih chu thil ghlawkthlak tak ni a a hrait thu sawiin, tun hun mai bakah nakin thlenga nun tana tangkai tur thiam thil, life skills zirchhuahna tangkai tak a nih thu leh, chin thalo, social evils laka invenna leh fihlim tura invenna tha tak a nih thu a sawi a. Kum engemaw zah hnuah rally buatsaih a ni leh thei chu a lawm thu sawiin, hman chhunzawm leh zel beisei a nih thu a sawi a. Thalaite hmasawnna lamah sawrkarin nasa taka hmalak a tum thu sawiin, Scouts & Guides activity tam zawk neih bakah pawl dangah te pawh zau zawka hmalak zel tum a nih thu sawiin, Sports & Youth Services Department hmalakna in NSS enrollment tam zawk nei tura hmalak tum a nih dan te sawiin, NCC battalion thar Lunglei a siam pawh office luah theih tep a nih thu te a sawi bawk a. Education Department nen a inbia in, Scouts & Guides enrollment tam zawk neih theih nan ruahmanna siam tum a nih thu a sawi a ni.

Mizoram Bharat Scouts & Guides 14th State Rally 2020 ah hian district zawng zawng atangin tel kimin, an vai hian rally ranger, service guide leh officials riak lut te nen mi 409 vel an ni a. Inelna hrang hrang 10 te neiin chung zingah chuan March Past, Folk Dance, Quiz, Pioneering Project, Food Plaza, Pageant Show, Painting Competition leh adangte bakah adventure activities te buatsaih a ni.

Vawiin Mizoram Bharat Scouts & Guides State Rally kharna inkhawm hi Sports & Youth Services Department Secretary Pu H. Lalengmawia chuan kaihruaiin, Pi Saizampuii, State Secretary, MBS&G chu camp report a pe a. Camp Chief Pi L. Rohmingthangi hnen atangin thusawi ngaihthlak ni bawkin State Chief Commissioner Pu Lalsangliana, SYS Director chuan lawmthu sawiin hun a khar a ni.