Vawiin khan Chief Minister Pu Zoramthanga chuan Mizoram Cooperative Apex Bank Ltd. Annual General Assembly vawi 26-na chu Vanapa Hall ah khuallian niin a hmanpui.

Chief Minister chuan ramin hma a sawn zelnaah bank pawimawhna a nasat tial tial thu sawiin, kuthnathawktuten buh leh bal atanga an thawhchhuah te, sorkar hnathawk te thawhchhuah te, contract leh supply atanga thawhchhuah zawng zawng belhkhawm, ram sum dehchhuah tehna chu pawisa a ni a, chu pawisa chu bank ah dah a nih loh chuan tunlai khawvelah hian a kal theihloh a ni a ti. Mizo mipui thawhchhuah pawh mahni bank ngei ah dah a, bank ten peipun a ngaih leh peipun sak a, dah him a tul leh dah him sakin, mipui ten hman tangkai ila, thenawm state te pawhin rawn chhim in a zar an zo theih nan hmalak a tul a ni, a ti.

Chief Minister chuan hmalakna reng rengah neitu thinlung pu a thawh chuan rah a chhuah that bik thin thu sawiin, mahni thawh tur chin theuh thawk satliah mai lova ngaihtuahna thar nen hmalak a  pawimawh a ti a. Land based economy, leilunga innghat economy chu a ngelnghet bik thu sawiin economy pawh a thang duang duh hle ang tiin, chutiang sum chevel buaipui tur chuan bank an pawimawh thu a sawi bawk. Sawrkar hmalakna hrang hrangte a theihna chinah chuan cooperative system a kalpui zel tum a nih thu tarlangin, Mizo thalaite zingah pawh commerce leh banking lama mithiam leh thawktu neih belh pawimawh a tih thu a sawi.

Vawiin MCAB General Assembly hi Pi T. Lalmuanpuii, MCAB Ltd. Chairman chu kaihruaitu niin Pu Lalzuahliana, Chief Executive Officer atangin report ngaihthlak a ni a, rorel a neih ni bawkin Vice Chairman chuan lawmthu sawiin hun a khar a ni.

MCAB Ltd. hi July ni 31, 1982 khan hawn a ni a, bank inrelbawlna hi Board of Directors kuta awm a ni a. Tun dinhmunah Mizoram pumah branch 18 a nei a, branch bakah hian Mizo tawng hman theihna ATM 14 a awm bawk. MCAB Ltd. chuan shareholder society te dinhmun chawikan nan National Minority Development & Finance Corporation (NMDFC) atangin loan Rs. 9.24 crores a sanction tawh a ni.