Vawiin chawhnu dar 1:00 khan Integrated Diseases Surveillance Programme (IDSP) Serchhip District bul tumin CMO Conference Hall, Serchhip ah Awareness Campaign on Rickettsial & Scrub Typhus neih a ni.

He hun hi Dr. Laldawngliana Sailo, CMO Serchhip kaihhruaiin, tunlaiin Serchhip khawpui leh a chhehvel khaw thenkhatah rannung seh natna a hluar thar leh mek thu te, he natna laka inven dan tur leh tihbo anih theihna tura hmalak dantur ngaihtuah ho chu thil tul leh pawimawih tak anih thu a sawi a.

He huna Resource Person Dr. Lalhlunpuii, DSO, IDSP Serchhip chuan Rickettsial & Scrub Typhus chungchang leh bihchianna a lem nen entirin zirtirna a pe a. Rannung seh natna (Scrub Typhus) chu khawvela lo hluar thar natna (Re-Emerging Disease) anih thute, he natna hrik hi sazu lam chi ho ten a thehdarh nia a lan thu leh India ram leh khawvel ram hrang hrangah bu a khuar mek tawh thu a sawiin, mihringa alo lanchhuah dante bakah Scrub Typhus veite enkawl dan turte leh he natna laka invendan turte bakah mipui vantlang hriat atana pawimawh tak tak a sawi a ni.

Serchhip District chhung khaw hrang hranga CHC leh PHC  te Reporta alan danin  kum 2018-2019 (May) chhung khan Rannung Seh natna vei mi 700 chuang hmuhchhuah tawh niin heng zinga mi 2 te chuan an thihpui a ni. He natna vei nia inringhlelte tan Serchhip Hospital ah Scrub Typhus Test a tih theih reng a ni.

Vawiina Rannung Seh Natna (Scrub Typhus) bihchianna hunah hian hriselna lama thawktu (Health Worker) te, Serchhip District Hospitala  thawktute bakah thuthar  lakhawmtute an tel ani.