2736/2024-2025

Dated Aizawl, the 29th October, 2024: Vawiin khan Mizoram Economic Association buatsaihin Mizoram Economic Summit 2024 Aijal Club-ah buatsaih a ni a. Chief Minister Pu Lalduhoma chuan he hun hi a telpui.

Thu a sawinaah Chief Minister chuan, mithiamten hetiang hun tha in buatsaih hi lawmawm ka ti a. Nilenga tel ve theih ka chak hle. Sawrkarna kan chan khan leiba tam tham tak kan chhawm avangin kan kawng a chho nghal hle a. Theihtawp chhuahin, renchem takin kan sum te kan enkawl a. Chuvang chuan tun hmaa RBI balance chhe tak nei thin khan tun Financial Year tawpah kha chuan RBI Balance Rs 500 Cr. chuang kan lo nei ta a ni. Healthcare sum ba te, Power Bill ba te kan pe thei ta a. Power Bill ah phei chuan rebate hmu hialin kan titha ta. GP fund tam tham tak pek chhuah a ni a, Pension sum rei tak tak lo tang tawh te pawh chin fel a ni. Election duty bill tang tam tak pek a ni a, sawrkar hnathawkte hlawh leh hamthatna, hun rei tak lo batsak tawh te pawh engemawzat chin fel a ni, a ti.

Chief Minister thusawi pawimawh dangte chu:

1. Hmasawnna hnathawhna tur sum kan hmuh thenkhat hi state share sang lutuk chite a lo awm a. Heng ang chi hi pumpelh hram hram tha kan ti. A theih chin chinah 100% grant leh 90:10 ang chite lam hawi kan duh.

2. Contractor-te agreement kan ziahpuiin contractor te tana tha bik rana ziak lo va, a sum petu sawrkar lam tana tha tur dap zel kan tum. Hna thawh chhia leh contractor thiltih fel lova kan hrem theih loh hian hna khan a tuar a, sawrkar sumin a tuar bawk thin.

3. Project kan ziahin central scheme te nena inhne rem zel kan dap tur a ni a, central scheme te kan chhawr thiam tur a ni. Sawrkar department leh agency ten an tihtheih ve reng consultancy firms kan tihtir thin pawh hi kan tihtlem a ngai.

4. Kan procurement rules hian man to takin thil min leitir thin niin kan hria a. Sawrkar sum renchem nana he dan hi siam that a tulin a lang.

5. Kan kawngpuite Bitumen hmanga kan siam thin hi keini ruahtui tamna ram tan chuan a tha tawk lo nia kan hriat avangin Ministry-ah Rigid Pavement hmanga kan kawngte min siamsak tawh turin ka ngen a. Hlawhtling thei se a duhawm khawp mai.

6. Integrity Pack kan buatsaih a. Hei hi chhungkhat laina hnaite duhsak taka contract pek tumna vengtu pawimawh a ni.

7. Pending projects a tam tawh avangin a thehluttu department ten an ngaihven zui tawh loh te a awm. Heng te hi singsaka kan ram mamawh mila thliar fel a ni ang.

8. SDG dashboard leh Project Monitoring dashboard kan hawng thar a, project kan vil uluk hle tawh dawn. Utilization certificate hi central hian a hlawma pek fel zel a phut tawh a, department thawk zo hma te kha a zo tlaiten an hnuk khawmuang tho tho thin. Heng hi vil uluk ngai kan ti.

9. K deposit-a sum kum thum aia rei dah tawh te kan dap khawm mek a, Rs 400 cr chuang kan la chhuak tawh.

10. Project reng reng department-in ama thua a lo thehlut ve mai thin kha kan remti tawh lo va, Planning Department kaltlang chauhva thehluh tawh nise kan ti. Hetiang bawk hian CSR pawh CM office atangin kan vil tawh dawn a. CM office in CSR hna thawh kan tum a ni lo va, mumal leh fel fai zawk a CSR kalpui kan tum zawk a ni.

11. Department tinte chu Service Review Committee lo din turin kan ti a. Sawrkar hnathawk tlak lo te dap chhuah a, a tul anga bantir thlenga hmalakna tur a ni, a ti.

Heng bakah hian project monitoring committee hmalakna te, sawrkarin ruahmanna a neih hrang hrangte a tarlang a.

A hawnna inkhawm hi Pu Samuel J. Laltlanzaua chuan a kaihruai a, Dr. James LT Thanga, President, Mizoram Economic Association chuan Economic Summit an buatsaih chhan a tarlang a ni.

Mizoram Economic Association te hi Mizoram University leh College a Economics Department-a thawktu leh zirlaite telna, economics lama tui apiangte tel theihna pawl a ni.