2737/2024-2025

Aizawl, 29.10.2024: Chief Secretary Dr. Renu Sharma, IAS leh PHE Secretary Er. F. Liantluanga, MES te chu Superannuation Pension a service an chhuahsan dawn avangin Mizoram Sorkar hnuaia Secretary te’n vawiin chawhma khan Secretariat Conference Hall-ah an pualin thlahna hun an hmang.

Chief Secretary Dr. Renu Sharma chuan Mizoramah hna thawka tum hnih a awm chhungin sorkara a thawhpuite bakah mipui atangin tawiawmna tha tak a hmuh thu sawiin an chungah lawmthu a sawi a.  Mizoram a awm chhungin thil tam tak a zirchhuah thu leh a hma hun zelah pawh Mizoram chu a tan hmun pawimawh tak a nih reng tawh tur thu a sawi. Chief Secretary chuan a ruala an thlah Er. F. Liantluanga chungchangah hnathawk tha tak a nih thu sawiin, Cyclone Remal avanga Aizawl khawpui tuilakna a chhiat avanga harsatna sukiang tura hma a lak dan kha chumi entirtu tha tak a nih thu a sawi.

PHE Secretary Er. F. Liantluanga pawhin a thawhpuite chungah lawmthu sawiin, state leh mipui tana hnathawhna hun tha tak a nei thei chu vannei a inti a. Thawhhona tha tak an lo neih ho tawhna chungah kalkhawmte hnenah lawmthu sawiin, Chief Secretary chhuak tur pawh a duhsakna a hlan a ni.

Vawiina Secretary ten an hun hman hi Commissioner & Secretary Pu H. Lalengmawia chuan kaihruaiin, Secretary tin ten thusawina hun an hmang bawk a ni.