2735/2024-2025

Aizawl, the 29th October, 2024: Vawiin chawhma dar 11:00 khan Directorate of AYUSH, Health & Family Welfare Department buatsaihin Assembly Annexe Conference Hall, Treasury Square, Aizawlah 'Ayurveda Innovations for Global Health' tih thupui hmangin '9th National Ayurveda Day, 2024' lawm a ni a. He hun hi Mizoram Governor Dr. Hari Babu Kambhampati chuan khuallian niin a hmanpui a, Health & Family Welfare Minister Pi Lalrinpuii chu khualzahawm a ni. 

Khuallian Governor Dr. Hari Babu Kambhampati chuan hmanlai atanga inenkawl nana lo hman tawh thin Ayurveda chu hriselna kawnga inenkawlna mai nilo, nunphunga bet tel tlat a nih thu sawiin, "Kum sangbi kalta atang tawh khan India ramah damna atana hman a ni a, rilru, taksa leh thlarau thlenga awmze nei taka thlunzawm kaltlanga hna thawk a ni," a ti a. Ayurveda chu tunlai natna tlanglawn lung natna, cancer, stroke leh zunthlum venna kawngah a pawimawh tih khawvelin a hmelhriat chhoh ve mek zel thu sawiin, Mizoram leh Northe East India chu biodiversity hrang hrang tamna, hemi kawnga hausa leh theihna nasa tak nei a nih avangin hengte leh Ayurveda kan thlunzawm phawt chuan kan healthcare system hi kan tihchangtlun thei dawn a ni, a ti bawk.

Dr. Hari Babu Kambhampati chuan tunlai thiamna leh tihdan phung tlo leh tha zawkte nena Ayurveda kalkawp tir thiam chuan India mai nilo khawvel pum tan hlawkna a pek theih dawn thu sawiin, "Ayurveda hian khawvelah ngaihven a hlawh chho mek zel a, ram 24 te'n an pawmpui tawh a, tunlai zirna inte pawhin Ayurveda hlutna an pawh chho mek zel a ni," a ti a. Ayurveda chawilar kawnga Sawrkar laipui Ministry of AYUSH hmalakna hrang hrangte tarlangin, Ayurveda atanga thil siamte ram 100 chuangah thawn chhuah tawh a nih thu a sawi a. Ayurveda kalpui danah chin dan thar tha zawk awm bawk mah se, a tum bulpui leh a nihna tak thlauhthlak a rem loh thu sawiin, zirbing mi leh Ayurveda hmangtute chu Ayurveda bulpui leh chin dan tharte kalkawp tir thiam tum turin a fuih a. Sawrkar, Research Institution leh Entrepreneur-te chu Ayurveda tihhmasawn kawnga thawk hova theihtawp chhuah turin a chah a ni. 

Khualzahawm Health & Family Welfare Minister Pi Lalrinpuii chuan Ayurveda-in tunlai natna hrang hrangte enkawl kawngah pawimawhna a neih thu sawiin, Mizorama ramhmul damdawi tam tak kan neih leh hemi lama tualto thiamna kan neihte chu Ayurveda chawilar kawngah a tangkai theih thu leh healthcare system pangngai nena kalkawp tir thiam a tul thu a sawi a. State Medicinal Plants Board Chairman ni bawk chuan ramhmul damdawi chin leh sawngbawl kawnga hmalaknate tarlangin, cheng vaibelchhe 1.2 project 'Forward and backward linkage in supply chain of medicinal plants - Integrated Component' kalpui mek a nih thu leh hand holding policy-ah medicinal plant telh tuma hmalak mek a nih thu a sawi a. AYUSH hmalaknate chu healthcare system nena kalkawp turin PHC, CHC, District Hospital, AYUSH Health & Wellness Centre 41 leh Integrated AYUSH Hospital, Thenzawl ahte hmalak tum a nih thu a sawi a. Zirna in changtlung zawkte nen zirbingna neih tuma tanlak a nih thu leh Traditional Medicine Preservation and Promotion Centre leh Herbal Garden-te Mizoramah din tuma hmalak a nih thu a sawi bawk.

He hunah hian Dr. Vanlalsawma, Director, AYUSH chuan inlawmna thu a sawi a. Dr. H. Malsawmtluangi, Consultant, NAM, Directorate of AYUSH hnen atangin Ayurveda chanchin leh Mizorama Ayurveda hmalaknate ngaihthlak a ni a. National Ayurveda Day puala Article inziahsiak lawmman sem a ni a. Dr. S. Mara Thansiami, Deputy Director, AYUSH-in lawmthu sawiin hun hman a khar a ni. 

National Ayurveda Day 2024 pual article inziahsiak lawmman dawngtute:-

Pakhatna: Lalsangzeli, Khawlailung. Rs 10,000/- + Certificate 

Pahnihna: Dr. Jonathan Lalrinmawia, ITI Veng. Rs 7,000/- + Certificate 

Pathumna: Lalnuntluanga, College Veng. Rs 5,000/- + Certificate

Full Speech of Hon'ble Governor of Mizoram: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-9th-national-ayurveda-day-on-29th-october-2024