2734/2024-2025

Siaha the 29th October 2024: Vawiin chawhma dar 11:00 khan Pu Abraham Beirazi Khithie, District Election Officer, Addl DC nibawk chuan DC Mini Conference Hall, Siaha-ah Special Summary Revision, 2025 neih turah, 1st January 2025 qualifying date hmanga duan Draft E/Roll a tlangzarh.

Pu Abraham Beirazi Khithie chuan roll tlangzarhnaa kalkhawmte chu lawmthu hrilhin vawiina tlangzarh tak draft roll hmangin revision neih a nih tur thu a tarlang a, paih ngaite paih a, siamthat ngai siamtha a, belh ngai belh tur a nih avangin a pawimawh hle a, fimkhur pawh a tul hle, a ti. Democracy ramah chuan mipuiin an duhtak an thlan theihna turin inthlanna langtlang leh thianghlim a pawimawh hle a, chumi tur chuan e-roll felfai leh hrisel neih hmasak phawt a tul, a ti bawk. Draft roll tlangzarh a nih hnuah AERO ten hearing neia an kalchhuah tur thu a sawi a, hearing neih naah NGO-te leh Political Party-te, khawtlang hruaituten roll felfai tak kan neih theih nan tangruala, thawhho a pawimawh tak zet a tibawk a, an puihbawmna a ngen nghal bawk a ni.

Vawiin Draft E/Roll tlangzarhnaah hian Election Officer, Pu Vanlalchhuanliana, SDO (S) nibawk chuan report a pe a, roll felfai leh thianghlim a awm theih nana BLO kaltlanga house to house verification an neih thu te, Polling station rationalization an neih thu te, roll a siamthat ngai an siam that te tarlangin nakkum January Ni 6, 2025 ah final roll tlangzarh hman an in beisei thu a tarlang bawk.

Draft roll tlangzarh tak hian 1st January 2025 chu tehfungah a hmang a, he draft roll in a tarlan danin tun dinhmunah 39-Saiha (ST) Assembly Constituency hnuaiah mipa voter mi 11,597 leh hmeichhia voter mi 12,683, an vaiin voter mi 24,280 an awm a. 40- Palak (ST) Assembly Constituency hnuaiah mipa voter mi 10,132 leh hmeichhia voter mi 10,346, an vaiin voter-mi 20,478 an awm a, Siaha District pumpuiah mipa voter-21729 leh hmeichhia voter-23029, an vaiin voter-44758 an awm mek a ni. Special Summary Revision (2024) nen tehkhinin draft roll tlangzarh takah hian 39-Saiha (ST) ah voter mi 36 in an pung a, chu chu za zela 0.15 niin 40-Palak (ST) AC bikah mi 11 a pungin za zelah 0.05 in a pung thung.

Vawiin Draft E/Roll tlangzarh tak hi Political party aiawh kalkhawmte hnenah Copy khat theuh chu Pu Abraham Beirazi Khithie chuan a hlan nghal a ni.