2733/2024-2025

Dated Aizawl,The 29th October 2024, Thawhlehni: Chin New Year Day lawmna hun hman puia kal,USA khawpui Washington a châm mek Rajya Sabha MP Pu K. Vanlalvena chuan nimin Thawhtan Ni  khan  United States of America Department of State Officer, East Asia, South East Asia and Pacific region changtu Pi Erin Kimsey chu a office chamber Washington ah hmuin, Mizoramah UNICEF office din a nih theihna atana hma lak sak turin a ngen a. Pi Erin Kimsey hi US official dang pahnih India Desk officer leh USAID officer ten an tawiawm bawk a ni.

Pu K.Vanlalvena chuan US officer hnenah hian Mizoram chu thenawm ram pathum Myanmar, Bangladesh leh Manipur atang te a politics kal fuh lo avanga ral tlante rawn fuan khawm mek na a nih thu te leh heng raltlan te zingah hian naupang kum tling lo tam tak an awm thu a hrilh a. Heng kum tling lo raltlan te hian Zirna tha te, Chaw tha te, Damdawi tha te leh silhfen thianghlim bakah chenna hmun tha leh thianghlim an mamawh thu Pu Vena chuan a hrilh bawk a. Heng an mamawhte pe vek tur hian Mizoram chu India rama state intodelh lo ber te zinga mi a nih avangin kan tan thil harsa tak a nih thu te sawiin; a rang thei ang bera Mizoram ah UNICEF office hawn a nih theihna tura hma lak sak turin Pi Erin Kimsey chu Mizoram MP chuan a ngen a. Pi Erin Kimsey chuan Pu Vena team te  thu thlen te chu thu pawimawh a nih thu sawiin a officea heng thu pawimawh an rawn thlen chu lawmawm a tih thu thu Pu Vena team te hi a lo hrilh nghal a ni.

Pu K. Vanlalvena hi USA a awm mek Chin Association of Maryland hruaitu te pahnih Pu Zo Tum Hmung Executive Director leh Rev. Tim Sienna, Board Chairman ten an tawiawm a ni.