3375/2024-2025

(Kalphung tharah sawrkar hnathawkte eirukna lakah an fihlim ngei tur a ni - Chief Minister)

Dated Aizawl, the 5th December 2024: Vawiin khan Chief Minister Pu Lalduhoma, Finance Minister ni bawk chuan Aijal Club Conference Hall-ah Mizoram Finance & Account Service Association te 29th Annual General Conference 2024 a hmanpui a. Thu a sawinaah "Kalphung thar sawrkarah officer te eirukna lakah an fihlim ngei tur a ni" a ti.

Chief Minister chuan, MFASA te duhsakna hlanin, hunpui lo thleng mai tur Christmas leh Kumthar chibai a buk a. Finance leh Planning lam a that loh chuan sawrkar sum kalphung leh hmalakna a kal dik thei thin lo va, an pahniha an chak hi a ngai thin. Chuvang chuan sawrkar hian a ngai pawimawh a, hun reilote chhungin Finance leh Planning lamah hian thil inthlakthleng duhawm tak tak kan hmu tawh a ni, a ti.

A thusawi tlangpuite chu:
1. Local audit kan tichak a, kalphung tha zawk a awm theih nan special audit te kan kalpui a, central sawrkarin local body grant te pe chhuak (release) tura online audit a phut avangin hun rei tak grant hi kan lo dawng tawh lo va. Hei hi kan bawhzui vat a, Delhi ah te ka zu sawi bawk a. A hnu lawkah Rs. 35 crore min rawn release sak ta a. Kumin chhung ringawt hian VC leh LC tana 15th Finance Commission Grant hi vawi thum ngawt, a vaiin Rs. 105 crore kan hmu tawh a. Kum 2022 hnua kan hmuh lehna hmasa ber a ni.

2. Inrenchemna lamah Assembly legislators ten bul kan tan a, kan hamthatna kan titlem a. Official ten in rawn zui a. Vawiina MLA leh Minister ten hamthatna an dawn mek hi party tin aiawh MLA te telna, Assembly General Purpose Committee pawmpui a ni.

3. Kan budget hmasa ber hi kan dinhmun dik tak tarlang thei tura duan (realistic budget) a ni a. Kan data neih ten duhthu erawh an la sam chiah lo. Data dik tak neiha kan nihna dik tak hriat hi tul kan ti a, data dik neih kawngah hmasawn zel kan tum. Budget proposal siam hun kan lo thleng leh der tawh a, budget dik (realistic) tak kawng hi department tinten i zawh ang u. Budget lang mawi tak, kan nihna ni lo deuh si an hmuh khan kan lan that hmel a. Revenue Deficut Grant kan hmuh hniam phah thei. Political Advantage atana lan that ai chuan kan nihna dik tak kan lantir khan ram tan a hnemhnanpuiawm zawk a ni.

4. A tlem thei ang ber sum puk ni se kan ti a, state matching share nei sang chi scheme pawh hi a theih hram chuan i pumpelh ang u. Overdraft lo va kal hram kan tum a, K-deposit pawh tihtlem ni se kan ti. K-depisit hian financial year kal meka kan sum hmuh te a ei hek ve zel vang a ni. Kan enkawl zawh tawk project la ila, scheme a awm vang ringawta bawhzui lovin kan ramin a mamawh dan zawk hi lal se kan ti.

5. Healthcare bill ba te, MR bill ba te tihfel kan tum zel a. GPF pawh Minister sawisak (recommend) kher lo va pek thin ni se kan ti. GPF leh pension hamthatna dang te hi kan pe chhuak hnem tawh hle. Sawrkar hnathawk hlawh hi a hma thei ang bera pek zel tumin kan bei fat fat thin. Power bill ba pawh chinfela, pe tha lawmman (rebate) lak theih zel kan tum a. Lak pawh kan la a. Mahse bill hlui tak tak a la rawn thlen belh zel rih. Department dangah pawh leiba tihfel tur a la awm nual.

6. Sawrkar hnathawk hlawh hi mi tam tak ei leh bar innghahna a nih avangin officer chak lo bik leh tuanmuang fal awm lo va lo buaipui vat vat turin ka ngen che u a ni. Central scheme behchhana hlawh la te hian harsatna an tawk nasa thin a. A chin fel dan kan ngaihtuah ho a tul hle.

7. Kalphung tharah sawrkar hnathawkte eirukna lakah kan fihlim ngei ngei tur a ni. Nangni kan Finance Officer te phei chu in dik mai a tawk lo, mi dangin mi dik in ni tih an hmuh a ngai. Sawrkarin hnathawk a lak hian human resource investment a nei tihna a ni a, kha hnathawktu kha sawrkar tana thawk chhuaktu tangkai a nihzui ngei a ngai.

8. Mizoram mipuiten an beisei inrelbawlna tha (Good Governance) a awm theih nan project monitoring lamah tan kan la nasa a, dashboard hmanga ka office atanga project zawng zawng lo endikna tur kan peih tep tawh. Service review committee pawh din turin thu kan chhuah a, aikal lak kan titawp a, biometric attendance kan kalpui bawk.

9. State sum leh pai dinhmun siam tha turin kan tang hle a, theihtawp min lo chhuahpui ang che u. In awmna theuhvah Financial Rules lo tungding rawh u.

10. Kan staff te welfare i ngaihthah lo vang u. Post sang lam kan ngaipawimawh thin a, a hniam lamah nasa takin kan tla bal mek. Hei hi kan siam that thuai loh chuan department leh office tam tak hi hnathawk hlei thei lovin an awm thuai dawn.

11. Handholding hi kan ngaipawimawh tak zet tih min lo hriatsak ula. He scheme hi economic reform chauh ni lova moral reformation thlenga beihpui kan thlakna a ni.

12. In hnathawhna lama in harsatna te ngaithla turin ka inpeih reng tih in lo hre dawn nia.

Pu Lalthansanga, MFAS, Secretary to the government of Mizoram, Finance chuan member te fuihna thu leh a tawnhriatte sawina a nei ve bawk.

A hawnna inkhawm hi Pu Vanlalsawma, President, MFASA in a kaihruai a. Chief Minister-in hun a hmanpui avangin lawmthu a sawi a, MFAS member thar 10 lawmluhna a nei bawk. Pu Vanlalfaka, TO, Aizawl chuan hunserh hmangin Pu C. Lalmuanpuia, Secretary, MFASA chuan report a pe a ni. Mizoram Finance & Account Service Rules, 2021 angin post (cadre strength) hi 92 sanctioned an ni a, chung zinga 62 chu luah mek niin deputation post 2 leh ex-cadre post pakhat an luah bawk a, hna ruak hi 30 a awm mek a ni.

Conference hawnna inkhawm hi Pu Laldinpuia, Vice President, MFASA chuan lawmthu sawiin a khar a. Chawhnu lamah an pawl thil pawimawh hrang hrang an rel a, tlai lamah an pawl hruaitu thar thlanna an nei leh a ni.