Lungphum phum inkhawm buatsaihah Pu Lal Thanhawla chuan New Delhi ah Mizoram House kan mamawhzia leh a pawimawhzia sawiin, tuna sak that tur hi a plan in duhthu a sam vak loh avangin, siam that deuh a ngaih tur thu a sawi a; hei vang hian a sak zawh hun tur pawh a tlai phah deuh a rin thu a sawi a ni. Chief Minister chuan Delhi a Mizo awmte chu Mizote aiawh an ni a, hei vang hian an thil tihna kawng engkimah fimkhura, Mizote aiawh tlak ngeia awm turin a chah bawk a. A sorkar thar chu mipui ten beiseina sang tak nen an thlir avangin lepse ngam khawpa kalpui a tum thu a sawi a. Mizoramah pawisa ngainatna a nasat lutuk tawh avangin, kan khawtlang nun thlengin a hniam phah a. Chuvangin khawtlang nun kan siam thatna tur kawngah te leh thenfai tur tam tak kan neihte, huaisen taka hna kan thawh theihna turin mipuite tawngtaipuina ka dil nghal che u a ni a ti.

Pu Lal Thanhawla chuan Mizoram chhunga hel awm reng rengte chu sorkar hun tiam chhunga lo chhuak / lokir vek turin a chah a; hun tiam chhung a pelh erawh chuan sorkar chu an chungah dimna a nei loving  a ti a ni.

Pu Hawla hi Home Minister Pu R.Lalzirliana, UD & PA Minister Pu Zodintluanga, Parliament Secretary Pu Lalthanzara, Pu Haukhum Hauzel, Chief Secretary te bakah, Mizoram House Officialte leh Govt of India Official ten an tawiawm a ni.

Mizoram House sak that tur hi August 2004 khan Vipin Gupta Associates in architechtural design hi an peihfel a. NDMC in a building plan chu May 2006 khan pawm fel lehin, kum 2007 khan Mizoram sorkar chuan a sakna tur pawisa Rs.1432.70 lakhs a sanction ta bawk a ni.Hei hian civil works,sanitary works,internal electrifications,HVAC, fire figtning,water treatment plant,electrical sub station, lift leh tul dang neuh neuh te a huam a ni. A building sak hna – civil,sanitary leh internal electrification – hi Engineering Projects India Limited ten Rs. 740.66 sengin an thawk ang a, thla 15 chhunga zo tura ruahman a ni.

A building tur hian Basement leh Ground Floor bakah, a chhawng Floor 3 thleng a awm dawn a ni. A building zau zawng hi 3072.81 sq.m a ni a. Suites 4,Double bedded Rooms 16, Staff Quarters 7 leh Residential Commissioner’s Office Ground Floorah te a awm ang.

Mizoram House thar tur hi peihfel anih hunah chuan New Delhi Vasant Vihara Mizoram House chu mipui mamawh phuhruk nan siam danglam a ni anga. Ruahman ang chuan tuna room 2 Governor tana dah hi room 4 ah siam a ni anga ; room 3 dang CM tana dah pawh room 6 ah siam tum a ni bawk anga; RC’s office pawh dormitory a siam a ni ang.