Vawiin January 9, 2009 hian Pu H.Liansailova, Minister, tuna Chief Minister charge la mektu chuan Minor Irrigation Department hotute a kawm a; he hun ah hian Pu K.S. Thanga, Parliamentary Secretary leh Pi L.Tochhawng, Principal Secretary ten an tawiawm a ni.

 

He hunah hian Pu H.Liansailova chuan thusawiin, “Sorkarna a inthlak hian engkim tihdanglam kher a tul lo thei a, mahse mi thar kan ni ang bawkin Department dawrtute pawh mi thar tam tak an awm dawn a. Ministry leh Department-a thawkte hian ram mipuite beiseina tihlawhtling tura theih tawpa hna thawh a tul a; lang tlang sorkar nih a tul. Kan hnathawh apiangte hi mipui chhawr tlaka tihpuitlin zel tur a ni. Project kan siamte pawh sum siamna ang leka hmang lovin, kan siam chhan ang ngeia mipui  hamthatna thawh ngei a tul a ni. Ministry-in duhsakna pea hnathawk tura hna pek a neih pawhin, sum siamna  tura ho taka thawk lovin, ram siamthatna tura hna tha tihpuitlin hi a tul a; chumi atan chuan E.E. te, S.D.O. te pawhin hnathawhna hmun (Field) tlawh zingin, JE te kut ngawta dah mai lovin tihtakzetin hnathawh a tul a ni. Keini pawhin a theih ang tawka tamin hmasawnna hnathawh a hmuna en kan tum ang. Tun hmaah khan thlai chi leina atan Agriculture-ah te sum tam tak dah a ni thin a, tum mumal awm lova, mipui mimirte mak tih khawpa sum siamna ang leka tihral tam thin kha tihbo a tul a ni. Sorkar Official te, Principal Secretary / Commissioner/Secretary thiltithei lo tura  kalkan (by pass) tam lutuk kha tihbo a tul a ni,” a ti.
   
Pu K.S. Thanga, Parliamentary Secretary pawhin thu tlem sawiin, “Ram siam thatna tùrin Department Officer-ten hotute an tawiawm that a tul a, tumahin min misguide loh tum ula a fuh ang. Minor Irrigation phei chu Departmental-a hnathawh a tam thin avangin hemi kawngah hian hnathawh puitlin ngei tura mi dik leh tha thlan a tul a, theih tawpa tanho a ngai a ni,” a ti.
   
Pi L Tochhawng, IAS, Principal Secretary pawhin thu tlem sawiin, “ Minister tawngkam atangin tih takzeta ram siamna tura hnathawh tumna a awm avanga lawm thu sawi pahin, Secretary leh Department Officer te pawimawhna bo lova, awmze neia hnathawh tumna avangin ramin hma asawn ngei a beiseiawm a ni tih a sawi a ni.
   
Pu Lalthanliana, Addl. Chief Engineer pawhin Department hmalak mek dan leh tuna hmabak an neih te, Irrigation Sub-Division Officer  post ruak hnawh khah a tul thu te, Division Office hawn  belh tul leh a ngaih pawimawh zawngte a sawi bawk a ni.