He meeting hi Director Pu Lalengmawian a kaihruai a. Pu J.H. Rothuama chuan officer leh staff-te kumthar chibai bukin kumtharah hian rilru thar nen thahnem ngai taka mahni hna theuha inhlan thar turin a sawm a. Sorkar tharin a ngaih pawimawh ber tur chu miretheite dinhmu rahbi tleu tawh New Land Use Policy hmanga chhanchhuah a ni dawn a; hetah hian Land Revenue & Settlement Department chuan dinhmun pawimawh tak a chelh dawn a ni a ti. Chuvangin a te ber atanga a lian ber thlengin thawhhona tha inlungrualna a pawimawh dawn a, harsatnate inhriatthiam puia rinawm taka kan hna theuh kan thawh a ngai dawn a ni a ti.

Minister chuan Land Revenue & Settlement Department hi department pawimawh tak niin state dangah phei chuan department pawimawh pahnihna a tling pha hial a, hetiang dinhmuna ding ve tur hian thawktuten kan zir pawh a ngai dawn a. Land Record nuai 2 chuangah ram buai 500 vel lek kan neih avanga department pumpui hminghliauna awm thei hi mipuiin hnathawh that dang an hriat loh vang mai a ni a, chuvangin heng ram buai te pawh hi a rang lama kan chinfel ngal a ngai dawn a ni a ti.

Pu Lalbiakmawia Khiangte, Commissioner pawhin thusawiin tun kum kalta chhunga Revenue Department hmalakna thar leh ruahmannate sawiin hmasawnna tur kan la ngah a, state danga tun ang huna an hnathawh dan kalhmangte zirin nasa takin kan inbuatsaih a ngai a ni, a ti. Scheme thar leh kalphung thar a inthlak chak angin keini pawhin kan inzir chak a ngai hle dawn a ni a ti a. Eng hna mah hi hna te lua leh zahthlak a awm lova, rinawm taka kan thawh chuan chu chu a zahawm mai a ni a ti.

Jt. Director Pu S. Rolianthangan department hnathawh leh dinhmunte a report a, tunah hian Revenue Deptt. ah hian thawktu an vaiin 463 an awm mek a, MR te nen chuan 666 an awm mek a ni a ti. Mizoram pumah Land Record 2,08,823 kan nei tawh a. Agriculture Land Sq. Km 36.6 lai kan zo tawh a ni a ti.

Pu V. Lianzinga, Dy. Director of Survey leh Pu Sangthuama, ASO-I in inlawmna thu leh lawmthu an sawi.

Hemi ni vek hian Pu JH Rothuama chuan a Department enkawl tur Co-operation hotu pawimawhte a office-ah ko khawmin hmalak dan tur chungchang huam zau takin a titi pui a. Department hotute hian an department kalphung, hmalak mek leh hmachhawp an neih hrang hrangte Minister hi an hrilh a. Harsatna eng engemaw an neihte pawh sawi tlangin hmalak ho dan tur chipchiar takin an sawi tlang a. Minister pawhin fuihna thu tha tak sawiin theihtawp chhuah a tanho a pawimawh ber thu an sawi a ni.