Nizan-a Chief Minister Pu Lal Thanhawla’n New Delhi Mizote tan Mizoram House-a zanriah a buatsaihah he thu hi sawiin Pu Zira chuan Mizoram chu Bangladesh leh Myanmar depa awm a nih avangin ram venhimna chungchangah fimkhur a tul tak meuh tih a sawi a. Kum 20 chuang kalta khan Mizoram-in remna leh muanna a neih theihna turin Chief Minister Pu Lal Thanhawla chuan a dinhmun a lo kiansan phal tawh a. Boruak ralmuanna hi engmahin a tihchhiat kan phal dawn lo tih sawiin Pu Zira chuan Mizoram dinhmun ti derthawng thei tura ralthuam chelek chingte, phalna nei lova silai kawl ru leh silai tawlh ruk chingte tan ngaihhnathiamna a awm lovang, a ti a. Sorkar contractor te pawh hun thara hna thawk tur an ni, tiin Pu Zira chuan an hnathawh atangin engzat per cent mah laksak an ni dawn lova, chuvangin an hna pawh a tha tur a ni, a ti a. Chumi tur chuan PWD lam pawhin uluk taka contractor te hna an vil a ngai ang, a ti bawk.

Home Minister hi Chief Minister rualin January 6 a  National Security Council meeting, Prime Minister hova neih leh January ni 7 a NEC meeting neih ah te  a tel a. National Security Council meeting ah hian firfiak ten tun hnaia Mumbai an beihna leh India ram hmun hrang hranga firfiakte chetna chungchanga state tin te tan lak dan tur sawiho a niin he meeting ah hian Prime Minister chuan India ram himna leh inpumkhatna chu engmahin a tichhe tur a ni lo, a ti a. Firfiaka chetna hmetmit turin state tin te chu theihtawp chhuaha tang tlang turin a chah a ni.

Home Minister hi vawiin khan Aizawl a lo thleng a. Union Minister for Labour & Employment Pu Oscar Fernandez an kawmna ah BPL member kum 65 chin chunglam te tan he ministry hnuaiah hian tar chawmna thla khatah Rs.200/- zel pek a nih tur thu Minister hian a lo hrilh bawk a ni.