Mizoram State Entrepreneurship Development Monitoring Committee (MEDMOC), Government of Mizoram leh IIM Calcutta Innovation Park (IIMCIP) tang dun hmalakna pawimawh tak, Mizoram-a awmze nei zawk leh zau zawka sumdawnna kalpui a nih theihna tura programme duan “Mizoram Kailawn” chu a vawihnihna atan  kumin April ni 4 atang khan kalpui leh a ni a. Vawiin khan entrepreneur-te intawhkhawmna leh he Business-Plan intihsiakna a tithate hnena lawmman hlanna, Mizoram Entrepreneurship Summit 2018 chu Chief Minister Pu Lal Thanhawla hovin Pachhunga University College Multipurpose Hall-ah hman a ni. Pu Lalsawta, Minister of Finance, Planning, etc. chu khualzahawm a ni. 

Chief Minister Pu Lal Thanhawla chuan thalaite khawvel siam turin sawrkarin kawng hrang hranga hma a lak thu sawiin, infiamna lamah a sang thei ang ber an thlen nan sports hmasawnna ruangam tha zawk din a, zirna lamah chuan export quality education siam tura hmalak leh, mi hmantlak siam tura skill education kalpui a nih thu te a sawi a. Entrepeneurship chu thalaite mamawh tak pakhat a ni tih hria in NEDP hnuaia Entrepeneurship Development Scheme kalpui a nih tel thu a sawi. Chief Minister chuan kum 20 chhung rambuai avanga Mizoram chu hmasawnna kawng zawh hleitheilo in awm mahse tun hnai hun reilo te chhungah India rama state hmasawn chak berte zing ami a rawn ni ta chu lawmawm a tih thu a sawi a. Per Capita Income-ah India ram pum chawhrual aia Mizoram PCI a san zawk danah te, GSDP thang duang ber state pali zing a Mizoram a tel te chu hmasawnna lawmawm tak a nih thu a sawi. Mi harsa zawkte tungding a leirem an rah theih nana New Land Use Programme hlawhtlinna belhchhah tur leh huamzau zawka hmasawnna kawng hawng tura New  Economic Development Policy kalpui chuan ram hmasawnna a tihchak ngei a beisei thu Chief Minister chuan a sawi a. India hmarchhak state pasarih Chief Secretary te theuh hnena NEC Economic Adviser-in NEDP zulzuia Action Plan siam tura lehkha a thawn chuan NEDP chu programme tha leh entawntlak a nih zia a tichiang a ni, a ti. Chief Minister chuan Mizoram Kailawn B-Plan Contest winner-te leh lawmman dawng pha velo te pawh an tuina ah nghet leh rinawm taka thawk chhunzawm zel a, an thiltum ah theihtawp chhuah chhunzawm zel tura fuihin, hlawhtling tura a duhsakna a hlan a ni. 

Planning Minister Pu Lalsawta chuan NEDP hnuaia entrepeneurship tihmasawn tura hmalakna pakhat, Mizoram Kailawn chu Mizoram economy in hma a sawn theihna kawng pakhat leh, thalaiten eizawnna kawng tha zawk leh hlawk zawk an neih theihna tura kawng inkawhhmuhna a nih thu a sawi a. Intihsiakna atang hian a tha ber a lo lan chhuah thin avanga tunah pawh Mizoram Kailawn hi Business Plan Competition anga kalpui a nih tak thu a sawi. Entrepeneurship Summit chhimtu thahnem tak an awm chu lawmawm a tih thu sawi bawkin MEDMOC hmalakna hnuaiah hian mi taima leh mi hrat te tan kawng a inhawng a ni, a ti a. Planning Minister chuan thalaite zingah eizawnna atan mahni kutkawih leh remhriatna ngei hmanga mahni thiam zawng leh tui zawng tih hian eizawnna tha leh hlawk tak a thlen thei tih hre belh zel tura a duh thu a sawi bawk. 

Vawiin Mizoram Entrepreneurship Summit buatsaih hi thuang hnih a kalpui niin, chawhma lamah entrepreneur ten mithiam sawm hrang hrangte atangin thusawi te ngaihthla in, inkawmhona te an nei a. Chawhnu lamah Plenary Session neih leh niin, hetah hian khuallian Chief Minister chuan B-Plan Contest a titha zual 5 te hnenah lawmman a hlan a. Top 3-te chu Tea VBH, VB Agri (Natural Fertilizer); Lalhmachhuani, SUDS Handmade Soap, Venghlui; leh Melvyn Vanlalhlimpuia, SACHA INCHI, Edenthar te niin, pakhatna in cheng nuai li, pahnihna in cheng nuai thum, pathumna ni cheng nuai hnih an dawng a. A dang pahnih - PB Lalrinfela, GING (ginger products), Thuampui leh K. Thanzami, Zoei, Zemabawk te hnenah Promising Ideas Award pek niin, cheng sing khat sangnga ve ve he award hian a keng tel a ni. Top 40 te hnenah Certificate pek vek a ni bawk. Plenary Session hi Chief Secretary Pu Arvind Ray chuan kaihruaiin, B-Plan contestant-te sumdawnna plan an siam sawifiahna video te thlirho a ni a. Programme hi Shubangshu, IIMCIP chuan lawmthu sawiin a khar a ni. 

Tun tum Mizoram Kailawn Business Plan Contest-ah hian project 330 chuang lutin, chung chu thlitfim a nih hnu in a tha zual 40 thlanchhuah an ni a, anni hi Boot Camp neihpui leh niin, chumi hnu ah an zing atang chuan titha zual 20 an thlang leh a. Top 20 atang hian vawiina lawmman hlan tak 5 te hi thlanchhah an ni. 

Mizoram Kailawn hi sawrkar hmalakna NEDP hnuaia Mizoram ah entrepreneur tam zawk an lo chhuah a, sumdawnna leh eizawnna hlawkthlak zawkte dap in anmahni leh midang tana eizawnna ngelnghat siam leh chhawn theihna tura hmalakna niin, chumi chuan ram ei leh bar hmasawnna a thlen phah dawn a ni. MEDMOC hi 25.10.2016 khan NEDP hnuaiah din a ni a, a tum ber chu Entrepreneurship development Scheme (EDS) kalpui niin Chief Secretary kaihhruaina hnuaiah Planning & Programme Implementation Department, Commerce & Industries Department leh Higher&Technical Department hotute an tel a, non-official expert member a an tel bawk a ni. 

MEDMOC thawhpui  IIM Calcutta Innovation park (IIMCIP) hi India rama Management zirna IIM-Calcutta hnuaia awm a ni a, India ram hmun hrang hranga entrepreneurship hmasawnna atana hmlatu ber niin India hmarchhak ah nasa takin hma a la mek a, Mizoram University leh tualchhung entrepreneur te nen kum 2 kalta atang khan hma lo la ho tawhin India ram chhunga State sawrkar hrang hrangte a lo thawhpui tawh a ni.