Chief Minister Pu Lal Thanhawla chuan vawiin khan Aijal Club-ah Mizorama Aizawl leh Lunglei District a hman tur North East Rural Livelihood Project (NERLP) bul tanna a hawng (Launch).

Chief Minister chuan NERLP hi programme tha tak, thingtlang mi harsa, a bik takin hmeichhiate, thalai eizawnna neilo leh mi harsa zual ngawih ngawihte nitin khawsak chawikan a ni tiin, NLUP ang deuh a ni a ti a. Chuvangin a thawktuten hlemhletna tel miah lo a kalpuiin, rinawmna, taimakna leh dikna nen an thawh a ngai dawn a ni a ti. Thingtlang miten an tangkaipui tur anih avangin mite tana malsawmna nih chu a tum ber pakhat a ni a ti.

Khualzahawm Rural Development Minister Pu R.Lalzirliana chuan kalkhawmte lawmna thu sawiin NERLP hi Mizoramin nghakhlel taka kan lo thlir thin a nih thu a sawi a. Tha tak a hlawhtlinna turin Bank lam a inhawnzau hle a tul dawn a ni a ti a. Thingtlang mite nitin khawsak chawikan chu a thil tum ber a ni tiin, Mizoramah Rural Development programme tam tak tih hlawhtlin chhoh anih thu a sawi a ni.

NERLP hi World Bank sum puihnaa kalpui tur niin, Union Ministry of DoNER hnuaia North East Livelihood Promotion Society in a enkawl tur a ni a. A project hi Regional Project Management Unit, Guwahati in thawkin, district level-ah District Project Management Unit leh Block level-ah Project Facilitation Team in an kalpui dawn a ni. He Project hi Hmarchhak State pali (4)Mizoram, Nagaland, Sikkim leh Tripura district pahnih theuhah kalpui tur a ni a, A project hian thingtlang khua 1624 a block 58 ah chhungkaw nuai thum a tuam dawn a ni.

NERLP bul tanna hawn inkhawmah hian NERLP Project Director H.K.Hajong in a project thil tumte a sawifiahna hun a hmang a. Central sorkar hnuaia mi pawimawh te leh Aizawl leh Lunglei atanga village council hruaitute bakah self help group member thahnem tak an tel a ni. Inkhawm hi

Pu Lalrimawia Ralte, Parliamentary Secretary, Rural Development-in a kaihruai a ni.