Nimin ni 25th September, 2013 chawhnu dar 2:00 khan Pu R.S. Lalzamliana, MCS , Addl D.C. kaihhruaina in a Office Chamberah Mamit khawpui chhunga thuthar thehdarhtute nen Systematic Voters Education and Electoral Participation (SVEEP) chungchangah meeting neih a ni.
He meeting ah hian Election Officer Pu Malsawmtluanga MCS chuan kumin inthlanpui lo awm turah Election Commission of India chuan SVEEP chu Mizoramah a vawikhat nana hmang tura a rawn tih thu sawiin hei hi India ramin zalenna kan neih kan hman tangkai leh zualna tura ruahmanna a nih thu a sawi a. Mi puitling vote nei thei chin India khua leh tui dik tak ten vote neih hlutna kan hriat thar lehzualna tur leh vote thlak pawimawhna leh vote thlak ngei tura dan in min phut thu te, kan zalenna hmanga vote kan thlak tangkaina te a sawi bawk.
India ram pum huapin vote kan thlak dan a tlak hniam thute leh thalaite zingah vote thlak na chang hre lo kan tam ber thu leh hmeichhia khawpuia chengten vote kan thlak tlem telh telh thu te tarlan a ni a. Hemi kawngah hian uar zawk a mipuite kan zirtir deuh deuh a ngaih thu te a sawi a ni.
Election Officer hian EVM hman dan zirtirna a pe bawk a. Pu Samuel Lalrinawma leh Pu H. Malsawmdawnga, Campus Ambassador ten SVEEP chungchang leh Electoral Roll a hming thun luh, paih leh insawn tura tih tur tul hrang hrang te a form hman dan te a zirtir bawk a ni.
