3444/2022-2023

01.02.2023: Ran hriselna enkawlna veterinary service changtlung zawk ranvulhtute'n an kawtkaia an dawn theihna tura hmalakna thar Mobile Veterinary Unit (MVU) 26 chu vawiin khan Chief Minister Pu Zoramthanga chuan CVSc&AH Play Ground, Selesih atangin a vailiam.

Heng Mobile Veterinary Unit (MVU) te hi Livestock Health and Disease Control Scheme hnuaia programme pakhat Establishment and Strengthening of Veterinary Hospitals and Dispensaries (ESVHD) programme hnuaia dilchhuah niin, MVU man hi Central Sector component a ni a, a vaiin (100%) central government tum a ni. MVU pakhat man Rs 16,00,000 niin Government of India in 2021-2022 ah Rs. 4,16,00,000 a release a. A enkawl zuina operational cost hi CSS component ni bawkin, staff hlawh te, oil man, damdawi ma, etc. ho state in 10% tumin, a bak zawng 90% chu sawrkar laipui tum a ni a. Hnathawktu tur Veterinary Doctor 26 leh paravet 26 te lak fel tawh niin, manpower outsourcing agency ah driver hna pek a ni thung.

Chief Minister chuan ram economy atana pawimawh tak pakhat - sa, bawnghnute leh thil dang kan hmuhna hnar ranvulhte leh, thenkhat tan chuan chhungkaw member ang hiala kan en kan ina kan ran vulhte hriselna chu ngaihpawimawh ngai tak a nih thu sawiin, mihring hriselna ang bawkin ran vulhte hriselna leh enkawl kawngah hmasawn zel a tul thu a sawi a. Vawiinah sawrkar laipui atangin hetiang kawnga hmasawnna kan hmu zel chu thil ropui tak a ni tiin, heng MVU te hi Mizoram pum, a bik takin hmun kilkhawr zawk ami te tan tangkai taka hman a nih ngei a beisei thu a sawi.

Khualzahawm AH & Veterinary Minister Er. Lalrinawma chuan sawrkar hotute theihtawp chhuah zarah vawiinah ranvulhtute tana tangkai em em tur MVU 26 lai vailiam a ni chu lawmawm a tih thu a sawi bawk a. Hrileng avang te ran vulhtute'n harsatna hrang hrang lo tawk tawhin, veterinary facility hmuh mai harsatna hmunah phei chuan ran damlo enkawl te hautak thin hle mahse, tuna chuan mahni kawtkai thlenga doctor te'n an rawn pan mai theihna tur MVU a awm ta hian rah tha a chhuah ngei a beisei thu a sawi a ni.

Vawiin MVU vailiam puala inkhawm tawi buatsaih hi AH&Vety Secretary Pi Lalzarmawii chuan a kaihruai a. Veterinary & Fishery Board Vice-Chairman Pu C. Lalmuanpuia, Health & Family Welfare Board Vice-Chairman Dr. Z.R. Thiamsanga, Bamboo Link Road Vice Chairman Pu Ramthanmawia, Manpower Development Board Vice-Chairman Pu Zothantluanga leh Commerce & Industries Development Board Vice Chairman Pu K. Laldawngliana leh midangte an tel a. Addl. Director Dr. Lalhmingthanga hnen atangin report ngaihthlak niin, Director Dr. Lalrinpuii Sailo chuan lawmthu sawiin hun a khar a ni.

MVU hi scheme guidelines in ran 1,00,000 tan MVU pakhat zel dil theih a nih avangin MVU pathum emaw pali emaw bak dawng thei lo tur Mizoram chu a nih laiin, tlangram inkalpawh harsatna hmun a nih avangin RD Block tina pek turin dilna siam a ni a. Mizoram dinhmun hrethiamin sawrkar laipui pawhin RD Block tina dah turin khatih hunlaia an dil zat MVU 26 a rawn pe ta a ni. MVU atana lirthei hman Force Skylar Vehicle hi pakhat man Rs 15,70,912 a ni a, Rs 29,088 hi registration leh branding atan hman a ni.

MVU te hi Block huamchhunga ranvulhtuten an hman tangkai theih dan ber tur ngaihtuahin hmun remchangah dah a ni ang a, Directorate a Call Centre nen thlunzawm a ni ang. District level ah chuan District AH & Veterinary Officer administrative control-na hnuaiah district huamchhunga MVU zawng zawngte dah a ni ang a, Daily Operational supervision erawh chu Senior Veterinary Officer kutah dah a ni ang. Block level ah chuan Operational supervision hi State Government Block Veterinary Officer te kutah a awm ang. Village level ah chuan department staff awm sa te hman tangkai an ni ang a. Anni hi ranvulhtute atanga thu dawng hmasa bertu leh a hnua enkawlzui (follow-up) tu an ni ang. Anni hian Directorate an Call Centre 1962 an bia ang a, thu an hlanchhawng ang. Call Centre ten an chinfel theih chin an chingfel ang a. An chin fel theih loh chu Mobile Veterinary Unit hnai berah an hlanchhawng ang.

Block huamchhung khaw tam zawkah department chuan staff a nei lo a. Heng khuaah chuan MZSRLM hnuaia A-HELP (Accredited Agent for Health and Extension Livestock) worker te emaw, LCRP (Livestock Community Resource person) te heng hna thawk tur hian hman a ni ang.