3445/2022-2023

Aizawl 1st February 2023: Vawiin chawhnu khan Er.Lalrinawma, Excise &Narcotics Minister chuan kumin Republic Day lawmnaa Excise & Narcotic Department atanga Governor’s medal dawngte lawmpuiin, a pisaah thingpui a inpui.

Er.Lalrinawma chuan lawmna inkhawmah thutawi sawiin Excise Department-ah hetiang Award dawng thei an awm chu a lawmawm tak zet a, thawktute infuihtharna leh chona thar siamsaktu ni thei se a duh thu a sawi.

“Ram leh hnam tana kan thil tih apiangah rinawmna, taimakna, thawhrimna nei chunga kan tih tur leh tih loh tur kan thliar hran thiam a pawimawh hle” Minister chuan a ti a. Chawimawina an dawn theihna chhan chu department enkawltu leh hruaitu tha an neih vang a ni tiin, hruaitu thain hruaitu tha bawk a chherchhuak thin tih hi a takin kan hmu a ni, a ti bawk. Zoram tana theihtawp chhuah thin Excise Department chu an thawh rimna fakin ruihhlo dona kawngah mahni nun thap hiala an thawhna chu a chhuanawm tak zet a, hmalakna kawngah harsatna an neih chuan department enkawltu hnenah sawi hreh lo a, theihtawp chhuah ho zel turin Minister Er Lalrinawma chuan a chah a ni.

Republic Day 2023 puala Governor Award dawngtute chu :
1.Lalnithang Sub-Inspector Aizawl Dist. (GOLD MEDAL
2.Laldanglova Driver, Commissionerate (SILVER MEDAL)
3.Jessy Remsangzuala C/355 Anti- Narcotic Squad (GOLD MEDAL)
4.H Lalzirliana C/340 Aizawl Dist. (SILVER MEDAL)

Vawiina lawmpuina inkhawm hi Pu K. Liantlinga Ex-MLA, Vice Chairman Social Welfare Board pawhin telpuiin lawmpuina leh fuihna thu a sawi a, hmalam pana theihtawp chhuah zel turin a chah a ni.

He hun hi Pu KT Beicho IRAS, Secretary, Excise & Narcotics Department-in a kaihruai a. Pu VLMS Dawngliana Joint Commissioner (Enforcement) chuan inhmelhriattirna leh medal dawng te chanchin te sawiin, department aiawhin lawmthu a sawi a ni.