3443/2022-2023

Aizawl, 1st February, 2023 : Mizoram State Subordinate Services Selection Board (MSSSB) hnuaia hnalak chungchanga lungawi lohna lantirtu Mizo Zirlai Pawl (MZP) hruaitute chu vawiin chawhnu khan Deputy Chief Minister Pu Tawnluia’n a pisaah kawmin an lungawi lohna lantir mek chu chawlhsan turin a ngen. Deputy Chief Minister hi School Education Minister Pu Lalchhandama Ralte, DP&AR Secretary Pu R. Lalramnghaka leh DP&AR Deputy Secretary Pu H. Lalrinpuia ten an tawiawm a, MZP hruaitute hi an adviser pahnih Pu F. Lalnienga leh Pu Lalhruaitluanga Chawngte ten an tawiawm a ni.

Mizo Zirlai Pawl hruaitute chuan MSSSB Chairman bang tura an phhut chhan leh zirlaite hmakhaw ngaia hma an lak dan chi hrang hrangte Deputy Chief Minister hnenah hian an thlen a, Deputy Chief Minister chuan an lungawi lohna chi hrang hrang an thlen hi uluk takin a lo ngaihthlaksak a, boruak zangkhai tak hnuaiah thu an sawiho thei a ni.

Deputy Chief Minister chuan MZP hruaitute chu ram leh hnam tana thahnemngai taka hma an lak thinnaah fakawm a tih thu a sawi a, a inep zawng ni lova boruak tha tak hnuaia an inkawm thei chu an puitlinzia tilangtu a ni a ti a. MZP ten rawtna chi hrang hrang an thlente chu sawrkar ang pawha an ngaihtuahnaa awm mek a nih thu sawiin, Department ang pawha hma lak an tum mekna a nih thu a sawi a, MZP ten an hlauhthawn zawng zawngte thleng lo tura hma lak a nih dan turte a sawifiah bawk a ni.

MZP hruaitute pawhin Deputy Chief Minister-in tha taka a lo dawnsawnnaah lawmawm an tih thu an sawi a, lungawi lohna lantir chawlhsan tura Deputy Chief Minister-in a ngenna chu zahawm an tih thu sawiin, anmahni ngawta thutlukna siam theih an nih loh thu an sawi a, an thawhpuite nen sawiho leh phawta a rang thei ang bera thutlukna inhrilh an remtih thu an sawi a ni.