Chief Minister Pu Lal Thanhawla chuan vawiin khan Mizoram Rural Bank (MRB) Branch 70-na Falkawnah a hawng.

Hawnna thu a sawiah Chief Minister chuan Sorkar leh Bank te hi mirethei zawkte chawikanna kawnga thawkho an nih thu sawiin, heng mite hian lei rem an rah ve na turah MRB hi a pawimawh hle a ni, a ti a. He Bank thar hawn tak hi Falkawn khua leh a tlangdung mipuite tan chauh nilo, sorkar tan hlei hlei a tangkai dawn a ni, a ti a. Chief Minister chuan Falkawn khua chu hmun pawimawh tak la ni tur, sumdawnna kawngpui la kaltlang tur leh Medical College awmna hmun tur anih avangin, a khaw mipuite chu hmathlir zau tak nei a, an ramte humhalh tha turin a chah a. Kawngpui te pawh la zauh zel ngai tur anih avang bawkin ngaihtuahna siam thiam turin a chah bawk a ni.

Chief Minister chuan bank hi mitin ina kan chhawr tangkai theih a ni a, hmasawnna kawng kan zawhnaah self help group, abikin nuho ten insiama interest tlem zawka loan lak theih a ni, tiin, a rulh huna rulh erawh kan bat a ni, a ti a. Tun hma lamah loan kan rulh that loh avangin kan inba ping deuh vek a ni, a ti. Mizoramah credit deposit ratio a tlem nia a hriat thu sawi bawkin, loan min pek tam hian tualchhung mi ten kan that phah a ni a ti a. A rulh lam erawh kan tih ngei ngei tur a ni, a ti.

Chief Minister chuan Falkawn khaw mipui te mai nilo, Zoram mipuite hian ringtu kan nihna angin kan khawsa em tih kan inbihchian a pawimawh a ni, a ti a. Hnam intodelh, changkang leh hmasawn ni turin taimakna a tul hmasa a ni, tiin, chumi ni thei tur chuan kan hriselna a that angai a, hrisel turin kan ei leh inah fimkhura, zuk leh hmuamah kan fihlim a pawimawh a ni, a ti a. Insum ngai kher lovin fihlim mai tur a ni a ti. Chief Minister chuan sum ngainatna leh duhamnain khawtlang nun a khawih pawi thei a ni tiin, Aizawl khawpui chep tak nachhan pawh kan duham vang a ni, a ti a. Taimak thu chungchangah Pu Hawla chuan tun ang renga kan kal chuan kan ram chhung ngeiah hian a ram leilung fate hi pawnlam mite hnuaiah kan la inhlawh ang, a ti a. Kan thawh theih reng pawh thawk peih lovin pawnlam mite kan thawh tir a, taima kan ni tak tak em tih kan inbihchian a kan thanharh a hun tak zet a ni, a ti.

MRB hawn tak chu Chief Minister chuan Falkawn leh a tlangdung mipui ten tangkai taka hmang turin duhsakna a hlan a ni.

Chief Minister hi bialtu MLA Pu K.S.Thanga, Parliamentary Secretary in a tawiawm a ni.

Mizoram Rural Bank Chairman Bhupen Deka chuan MRB hi Core Bankingah a awm thu sawiin, kumin chhung hian branch dang 6 hawn tum a ni a ti a, hawn leh hmasak ber tur chu Bawngkawn Branch a ni, a ti.

Hawnna inkhawm hi Pu PL Chhuanthanga, Senior Manager (NPA) in a kaihruai a, Farooque Shahab, General Manager, (NorthWest II), State Bank of India, Guwahati in a rawn hmanpui bawk a ni.