Vawiin khan Chief Minister Pu Lal Thanhawla chuan Mizoram Rural Bank branch 82-na Mizoram Rural Bank Sesawng Branch chu a hawng. Bank a hawn hnu hian Sesawng Community Hall ah Bank hawnna puala programme a hmanpui nghal a ni.

Chief Minister Pu Lal Thanhawla chuan tunlai khawvel thiamna sang chho mekah bank te pawimawhna a pung zel a, Mizoram hmun kilkhawr berah pawh a tel lovin kan khawsa hlei thei lova. Mizoram pum bank ten an tuam theihna turin branch tam thei ang ber hawn a nih theih nan Sawrkar Laipui leh Nationalised Bank hotute dawrin kan ngen zel a. Sesawng leh a chhehvel khua ten bank an mamawhna phuhru tura MRB Branch hawn a ni ta hi thil lawmawm tak leh mipuite tana thil tangkai tak, awlsamna tam tak chhawpchhuah sak thei a ni dawn, a ti a. Mipuite chu bank hi a tangkai thei ang bera hmang tura chahin Pathian in malsawm nan bank hi a hman ngei a rin thu a sawi a. Bank chu fai leh thianghlim taka enkawl a nih theih nan a thawktute hemi kawnga tan kalpuia pui turin a chah bawk a ni.

A sawizel naah Prime Minister in mipuiten bank te tangkai zawka an hman theih na turin tangka fai tel lova sum hman leh enkawl ruahmanna hrang hrang a kalpui mekte Mizoram mipui pawhin kan hman theihna turin inzir chhoin tanlak mek a nih thu a sawi. Sawrkar hamthatna hrang hrang, a dawngtu tur ngei ten an dawn tur dik taka an dawn thei nan a Direct Benefit Transfer hi a bik takin bank leh mipui tan a pawimawhzual bik a, chuvangin banking facilities hian mipuite a huamzau a ngai a ni, a ti.  Thingtlanga bank te hi mipuite ngheng hnai ber an nih thu te tarlangin thingtlang ah bank tam thei ang ber hawn chu sawrkar duh dan a ni,  a ti a. NLUP ah te tangkai taka bank te hman a ni a, chutiang bawkin Sawrkar programme thar kalpui mek- New Economic Development Programme (NEDP) ah pawh bank te hi a tangkai thei ang bera hman tum a ni, a ti bawk.

Pu Lal Thanhawla chuan Sawrkar tum ber chu mi hausa leh mirethei inkar a zim thei ang bera siam a ni a, hemi atan kuthnathawktute hamthatna leh hmakhua ngaihtuahin an dinhmun chawi kanna atan theihtawp chhuaha tan lak mek a nih thu a tarlang a. Politics chungchang a sawi lan naah Chief Minister chuan Politics hian Ringtu kan nih angin kan thlarau nun thleng a khawih a, a inlumletna hian mitin angkhatin min hrut a, dawt leh thu dik chanve a leng lova, ram leh hnam siamna hmanrua a ni, a ti. Mizoram chu khawvel hriata phochhuah mek a nih thusawiin hemi atana kawng hrang hranga hmalakna leh ruahmanna awm mekte a tarlang a ni.

He hun hmanpuitu dang Chalfilh bialtu MLA Dr. Ngurdingliana chuan a bial chhungah MRB Branch pahnih hawn a ni ta chu hmasawnna ropui tak a nih thu sawiin a bial chhunga Sawrkar hmalaknaah lawmthu sawiin hriselna dinhmun tih that, zirna chawikan leh thalaite hmakhua ngaihtuah chu a bik bial tana a ngaihpawimawh a ni thu a sawiin bial chhunga sawrkar hmalakna hrang hrang a tarlang a ni. Bialtu MLA hian miharsa zual 10 tena Rs. 1000 theuh va account an hawn theihna turin Rs. 10000 bank hotute a hlan nghal a ni.

MLA Pu  V. Lalrobiaka leh MLA Pi Vanlalawmpuii Chawngthu te pawhin he hun hi hmanpuiin Chief Minister an tawiawm a. MRB Chairman Pu Gautam Sengupta leh a thawhpui dangte pawh telin Pu Sengupta chuan inlawmna thu a sawi.

Mizoram Rural Bank hi September ni 27, 1983 khan din niin State Bank of India sponsored a ni a. Tunah hian District 8 leh RD Block 26 te chu an tuam vek tawh a, Branch 82 neiin hnathawktu nghet 344 awm mek a, a ngheta lova thawk mi engemaw zat an awm bawk a. Mizorama Bank inzarpharhte zinga Branch ngah ber an ni a. Sum enkawlna tam lamah SBI dawt chiah niin nikum khan hlawkna cheng nuai 2400 vel an hmu a, kumin kal mek, kum chanve (half yearly) September ni 30 thleng khan hlawkna cheng nuai  1800 vel an hmu tawh a ni. India rama Regional Rural Banks zinga thawktha chawimawina  Top Performer Award kum 2014 leh 2015 ah te khan an lo dawng tawh a ni.